Kandidati për kryeministër, Ramush Haradinaj, në tubimin e mbajtur në Grabanicë të Klinës ka premtuar përfundimin e rrugës tranzitore që e lidh Klinën me Istogun dhe Skenderajn, ndërtimin e impiantit të ujërave të zeza dhe zhbllokimin e rrugës për Gjakovë.
Haradinaj po ashtu ka premtuar anëtarësim direkt në NATO, investim në mbrojtje mbi 4% të GDP-së, sjellje të gazit amerikan, ndërtimin central me gaz për energji të lirë, paga minimale dhe pensione jo më pak se 500 euro si dhe pagë mesatare 1000 euro.
“Në Grabanicë të Klinës, bashkë me kryetarin Zenun Elezaj dhe kandidatët e tjerë nga kjo komunë: Marqe Selmanaj e Dr. Haxhi Ibishi, prezantuam programin tonë transformues për një Kosovë Fituese. Klina, nën udhëheqjen e Aleancës, është shembull i qeverisjes së mirë dhe dëshmi se çfarë mund të arrijmë kur kemi vizion të qartë dhe vullnet për veprim. Do ta përfundojmë rrugën tranzitore që e lidh Klinën me Istogun dhe Skenderajn, do të ndërtojmë impiantin e ujërave të zeza dhe do të zhbllokojmë përfundimisht rrugën për Gjakovë. Kosova ka nevojë për siguri të përjetshme përmes anëtarësimit direkt në NATO. Nuk ka më kohë për eksperimente me sigurinë nacionale që i shërbejnë Rusisë e Serbisë. Do të rrisim investimin në mbrojtje mbi 4% të GDP-së. Do të sjellim gazin amerikan dhe do të ndërtojmë central me gaz për energji të lirë. Do të garantojmë paga minimale dhe pensione jo më pak se 500 euro, dhe paga mesatare 1000 euro”, ka thënë ai.
Gjithashtu në këtë tubim ai ka deklaruar se qeverisja e Kurtit po e mban Kosovën të izoluar, të varfër dhe pa perspektivë.
“Qeverisja e Kurtit po e mban Kosovën të izoluar, të varfër dhe pa perspektivë. Nuk ka më keq se kur një popull me potencial kaq të madh mbahet peng i një udhëheqësie që nuk di të qeverisë. Sot, me rezerva shtetërore të vjedhura, energji të shtrenjtë dhe miqësi të prishura me aleatët, Kosova po përjeton dështimin më të madh në historinë e saj të pasluftës”, ka deklaruar Haradinaj.
