Ambasadorë të vendeve evropiane e figura politike në Kosovë u mblodhën në këtë sallë të martën me ftesë të ambasadës hungareze në Prishtinë.
Kjo për të shënuar fundin e presidencës hungareze në Këshillin e BE-së.
Ambasadori hungarez, Bela Bozsik, në fjalën e tij para të pranishmëve numëroi arritjet që shënoi gjatë udhëheqjes së Këshillit të BE-së.
“Ekziston një thënie që ‘vetëlëvdata ta shpif’. Prandaj më lejoni të citoj presidenten e Komisionit Evropian, Ursula von der Leyen rreth presidencës tonë. ‘Presidenca juaj erdhi në tranzicionin ndërmjet dy ciklave politik. Kjo gjithmonë sfidë në vete. Megjithatë, unë kujtoj shumë ngjarje të mëdha gjatë këtij mandati. Ju avancuat përkrahjen tonë për Ukrainën me adaptimin e 15 pakove të sanksioneve dhe pajtimit për kornizën e punës së G7 në nivel global”, ka deklaruar ai.
Ai mes tjerash foli edhe për mundësitë që iu ofruan Kosovës gjatë gjashtë muajve sa Hungaria kishte presidencën e BE-së.
“Ne gjithashtu kemi përkrahur integrimin e Kosovës. Ne kemi ftuar zyrtarë kosovarë në të gjitha takimet në të cilat mund të merrnin pjesë si përfaqësues të një vendi potencial për statusin e kandidatit, dhe ministri hungarez për punë evropiane vizitoi Prishtinën”.
Duke folur për presidencën e Hungarisë në Këshillin e Bashkimit Evropian, zëvendësministrja e Punëve të Jashtme dhe Diasporës, Liza Gashi u shpreh e zhgënjyer për mos heqjen e masave ndëshkuese.
“Ne mbetemi të zhgënjyer nga moslargimin e plotë të masave të padrejta ndaj Kosovës dhe mungesës së pyetësorit formal për statusin tonë të kandidatit. Kosova për kohë të gjatë ka përkrahur anëtarësimin në BE, e BE-ja ende vazhdon të lidhë integrimin tonë me dialogun e vazhdueshëm me Serbinë, i cili në një mënyrë edhe më tej kufizon integrimin e qytetarëve të Kosovës”, ka deklaruar Gashi.
Hungaria kishte udhëhequr Këshillin e BE-së nga 1 korriku deri më 1 janar të këtij viti.
