Kandidati për deputet nga AAK, Muhamet Mujaj ka thënë se duket se qëllimisht Lëvizja Vetëvendosje dëshiron më i humbë zgjedhjet.
Kjo pasi sipas tij, ata çdo ditë po hapin fronte të reja të “luftës” duke akuzuar Prokurorinë, Gjykatat, mediat dhe sindikatat e ndryshme.
Tutje, ai tha se nuk ka mundësi që ata të fitojnë shumë vota duke u bazuar në frontet që kanë hapur dhe kjo do t’iu kushtojë me humbje të pushtetit.
“Partia në pushtet e ka humbur komplet orientimin, sikurse me qëllim kjo parti dëshiron që të largohet nga pushteti, t’i humb zgjedhjet për shkakun se ka hapur shumë fronte të ‘luftës’ të cilat janë në dëme të shoqërisë dhe rrezik për demokracinë e shtetit. Në çdo ditë shohim komunikata që akuzojnë sistemin e Drejtësisë, Prokurorinë, Gjyqësinë, pastaj kundër Gjykatës Kushtetuese, mediave, sindikatave, kudër të gjithëve. Nuk ka mundësi që t’i marrë ato vota, prek kujt t’i marrë ato, kur ka hapur fronte e fronte të cilat do t’i kushtojnë me humbje të pushtetit”, ka deklaruar ai në emisionin “Ditari” në Tëvë1.
