Anëtari i kryesisë së PDK-së, Zenun Pajaziti, ka reaguar ndaj deklaratës së kryeministrit Albin Kurti se nuk ka parë reformim të partive opozitare si PDK, LDK dhe AAK në katër vitet e fundit.
Pajaziti në emisionin “Info Nata” ka thënë se për të parë kush sa është reformuar Kurti duhet të ofrohet vetë në debat me partitë opozitare.
Sipas tij shmangia e debatit me këto parti do të thotë se Kurti nuk është i gatshëm të përballet me këto tema.
“Mendoj që Kurti duhet të ofrohet në debat vetë me PDK-në edhe me partitë e tjera që të debatojë kush sa është reformuar, mendoj që për sa lexova sot që ai po i shmanget edhe disa studiove televizive do të thotë që nuk ka një gatishmëri të përballet me këto tema. Padyshim që kjo nuk është edhe ndonjë temë, nuk mundet as kjo pyetje ta largojë dështimin e kësaj qeverie, sepse siç e dini edhe ju tashmë PDK-ja ka një lidership të ri, kohëve të fundit tashmë veç e kemi edhe kandidatin për kryeministër një person i cili ka dëshmuar për shumë vite një angazhim gati të përsosur në qeverisjet edhe në nivel lokal edhe në nivel qendror në fushën e ekonomisë e kështu që do ta shohim në zgjedhje”, ka thënë ai.
Ndryshe, kryeministri i vendit, Albin Kurti, të hënën ka përjashtuar mundësinë e një koalicioni paszgjedhor me PDK-në, LDK-në apo AAK-në. Ai ka thënë se nuk ka parë ndonjë reformim të këtyre partive në katër vitet e fundit.
“Ne nuk shohim mundësi që të kemi koalicione paszgjedhore prandaj edhe i kemi bërë ato parazgjedhore, së pari me partinë Guxo dhe gjithashtu me partinë Alternativa, me të cilët kemi bashkëqeverisur në këto katër vjet dhe i kemi përvojat dhe mbresat më të mira nga njëri-tjetri. Partitë që kanë qenë gjatë në qeverisje në Kosovë për dy dekada, nganjëherë dy prej tyre, nganjëherë të trija bashkë, PDK, LDK dhe AAK, në këto katër vite unë nuk kam parë që janë reformuar dhe kur e kemi parasysh se, sidomos në muajt e fundit, sulmet që janë bërë ndaj subjektit tonë politik, ndaj eksponentëve të subjektit tonë politik, ndaj qeverisjes sonë të mirë e demokratike, nuk shohim mundësi që të kemi çfarëdo koalicioni në mandatin tjetër, për më tepër që nuk do të jetë as i nevojshëm”, ka deklaruar Kurti./teve1.info/
