Të enjten është mbajtur konferenca vjetore e Bankës Qendrore të Kosovës.
Me këtë rast është lansuar Platforma për krahasimin e produkteve dhe shërbimeve financiare për qytetarët.
Sipas BQK-së qëllimi i Platformës është të kontribuojë në rritjen e transparencës, mbrojtjen e konsumatorit, edukimin financiar, si dhe avancimin e qasjes në financa.
Përmes kësaj platforme konsumatorët mund të krahasojnë tarifat e produkteve dhe shërbimeve financiare në dy mënyra: përzgjedhjen sipas produkteve dhe përzgjedhjen sipas institucioneve.
“Tarifat e shpalosura në këtë Platformë përcaktohen nga institucionet financiare, të cilat janë përgjegjëse për saktësinë, vërtetësinë dhe përditësimin e të dhënave të shpalosura në Platformë”, thuhet në njoftim.
Guvernatori i BQK-së, Ahmet Ismaili njoftoi se se viti 2024 do të mbyllet me një rritje ekonomike prej 4.3 për qind.
Ndërsa, sic bëri të ditur guvernatori, rritje të dukshme kanë shënuar kreditë, të cilat janë rritur 15.7 për qind krahasuar me vitin e kaluar. Gjithsej, kreditë në nëntor 2024 kanë arritur në 5.668 miliarda euro, duke regjistruar një rritje prej 768.9 milionë euro në krahasim me dhjetorin e vitit 2023./teve1.info/
