Kosovarët janë përdoruesit më të mëdhenj të internetit në Europë, por shteti nuk njihet nga shumica e platformave digjitale. Kërkohet lobim më i madh në këtë aspekt
Është shteti me përqindjen më të madhe të përdorimit të internetit në Europë.
Por Kosova vazhdon të jetë vendi i vetëm pa qasje të plotë në platformat globale.
E lidhur me njohjen e shtetit nga korporatat e mëdha digjitale, disa herë u nisën peticione.
Ato u organizuan nga qytetarë e organizata jo qeveritare.
Ndërkaq së fundmi gjatë një vizite në SHBA, presidentja e Kosovës, Vjosa Osmani kërkoi përfshirjen e shtetit në platformën Google dhe Amazon.
Megjithatë sfidë e qeverisë sipas ekspertëve të kibernetikës mbetet të kuptuarit drejt dhe mirë të hapësirës kibernetike.
“Mos kuptimi i drejtë dhe i mirë i hapësirës kibernetike e ka vendosur Kosovën konkretisht në pozita jo të përshtatshme, ku qytetarët e RKS që nga forma e identifikimit kur hynë në një nga hapësirat kibernetike nuk identifikohen si qytetarë dhe kur tentojmë të marrim ndonjë shërbim nuk mund të marrim ndonjë shërbim si qytetarë të RKS, apo edhe të japim një shërbim”, thotë Mentor Hoxha, ekspert i kibernetikës.
Mirëpo jo vetëm këto arsye janë pengesë për njohjen digjitale të shtetit të Kosovës.
“Duke pasë parasysh kohën qe sa jemi si shtet i pavarur dhe të çliruar, normalisht që jemi pak të vonuar në këtë aspekt. Mirëpo këto pengesa ose barriera janë kryesisht politike. Shtetet që përkrahin Serbinë ose që kanë një strategji bashkëpunimi me ta, ne jemi peng të këtyre marrëveshjeve, prandaj edhe kemi shumë pengesa në këtë drejtim”, thotë Adrian Tërshnjaku, ekspert i kibernetikës.
Por çfarë duhet bërë institucionet në këtë drejtim?
“Një lobim pak më i madh, qoftë përmes ambasadave ose organizatave të ndryshme, pastaj pjesëmarrja nëpër rrjetet e ndryshme sociale me video promovuese normalisht të mbështetura prej dikastereve shtetërore”, shprehet Tërshnjaku.
Tëvë1 ka pyetur Qeverinë e Kosovës nëse ka kërkuar njohje zyrtare nga platformat digjitale, mirëpo deri në publikimin e kronikës nuk është kthyer përgjigje.
