Sigurimet shëndetësore të Policëve janë një kërkesë e kahmotshme e tyre. Ministri i Brendshëm, Xhelal Sveçla tha që projektligji është në Gjykatën Kushtetuese, teksa ish punonjësit e Policisë së Kosovës thonë që nevoja për sigurime është emergjente.
Po patrullonin në pjesën veriore të vendit.
Por, gjatë rrugës një autoblindë e Policisë së Kosovës u vet-aksidentua në fshatin Grabovc të Zveçanit.
Për pasojë, tetë zyrtarë policorë morën disa lëndime të rënda, ku njëri nga ta edhe iu nënshtrua një operacioni.
Pas këtij aksidenti, Sindikata e Policisë kërkoi që sigurimi shëndetësor për policët të jetë prioritet për institucionet.
“Çështja e sigurimit shëndetësor për policët është ngritur prej kohësh, por deri më tani, institucionet përgjegjëse nuk kanë arritur të ofrojnë një zgjidhje konkrete. Sindikata e Policisë së Kosovës mbetet e përkushtuar që të vazhdojë të angazhohet për të drejtat dhe mirëqenien e punonjësve të saj, duke kërkuar nga institucionet e Republikës së Kosovës që t’i japin kësaj çështjeje prioritetin që meriton”, thuhet nga Sindikata e Policisë së Kosovës.
Për këtë çështje, tëvë1 pyeti edhe ministrin e Punëve të Brendshme, Xhelal Sveçla.
Por, i pari i kësaj Ministrie pati vetëm një përgjigje të shkurtër.
“Ju e dini shumë mirë që sigurimet shëndetësore një subjekt politik opozitar i ka dërguar në Gjykatën Kushtetuese. Pyeteni Gjykatën Kushtetuese për këtë”, tha Sveçla.
Mediumi ka dërguar pyetje për këtë çështje edhe në Gjykatën Kushtetuese, por që gjatë ditës nuk ka marrë përgjigje.
E ish-eprori i Policisë thotë se është shqetësuese që deri më tash nuk janë realizuar sigurimet jetësore e shëndetësore të policëve.
“Në anën tjetër ende vazhdojnë të mbesin të hapura këto tema dhe asgjë nuk po ndërmerret deri më tani edhe pse tash jemi në fushatë zgjedhore dhe të gjitha problemet po dalin se po gjejnë zgjidhje, po rregullohen por ky problem nuk kam dëgju që asnjëherë nuk është ngritë as nga partitë opozitare se do të zgjidhet të cilat pretendojnë ta marrin pushtetin dhe të fitojnë zgjedhjet apo as nga partia që është në pushtet asnjëherë nuk i ka dhënë zgjidhje qoftë që në një të ardhme të afërt të përmbyllet tema që janë shumë domethënëse dhe i mbulojnë këto çështje të sigurisë së tyre jetësore dhe shëndetësore”, tha nënkoloneli në pensioni i policisë, Rrahman Sylejmani.
Për sigurime shëndetësore dhe kërkesa tjera, pjesëtarët e Policisë kishin protestuar dy herë vitin e kaluar para objektit të Qeverisë.
