Mëngjesin e sotëm një sulm me thikë ka ndodhur në një shkollë fillore në kryeqytetin e Kroacisë, Zagreb. Policia bëri të ditur se një nxënëse 7-vjeçare dhe një mësues kanë vdekur nga plagët e marra, derisa pesë nxënës tjerë janë lënduar.
Një sulm me thikë ndodhi në një shkollë në Zagreb të Kroacisë mëngjesin e së premtes.
Aty mbeti e vdekur një vajzë 7-vjeçare dhe një mësues, derisa të plagosur u regjistruan pesë nxënës, thanë autoritetet atje.
Ata theksuan se sulmi ndodhi rreth orës 09:50 në shkollën fillore Pecko, ku sulmuesin e përshkruanin si mashkull të ri dhe se i njëjti tashmë është arrestuar.
Sipas ministres së Shëndetësisë Kroate, sulmuesi ishte mbi 18-vjeç.
Në disa pamje të publikuara nga mediat kroate, shihen fëmijët duke ikur nga ndërtesa e shkollës dhe një helikopter mjekësor që u ulë në oborrin e saj.
E kryeministri Andrej Plenkoviç tha se është i tmerruar nga sulmi dhe se autoritetet janë ende duke punuar për të përcaktuar saktësisht se çfarë ka ndodhur.
Madje ai tregoi se disa fëmijë janë dërguar në spitale të ndryshme në Zagreb.
E televizioni shtetëror HRT tha se sulmuesi hyri në shkollë dhe shkoi direkt në klasën e parë që e gjeti dhe sulmoi fëmijët.
Ndryshe, sulmet në shkolla janë të rralla në Kroaci.
Majin e kaluar, një adoleshent në Serbi hapi zjarr në një shkollë në kryeqytetin Beograd, duke vrarë nëntë bashkënxënës dhe një roje shkolle.
