Shefi i grupit parlamentar të PDK-së, Abelard Tahiri, e ka cilësuar mesazh të keq për qytetarët mosparaqitjen e kryeministrit të Kosovës, Albin Kurti, në Prokurorinë Speciale, ku ka qenë i ftuar të dëshmojë në cilësinë e dëshmitarit në një rast penal.
Sipas Tahirit nuk është e mirë kjo mënyrë e trajtimit të organit të akuzës nga ana e kryeministrit pasi siç ka thënë ‘pushtetet janë të ndara dhe gjithkush duhet ta kryej punën e vet’
“Është një mesazh i keq për qytetarët me mënyrën se si në këtë rast e trajton organin e akuzës. Siç e ka përcaktuar edhe Kushtetuta, pushtetet janë të ndara dhe gjithkush duhet ta kryej punën e vet, organi i akuzës është për mos me i leju keqpërdorimet dhe me i luftu dukuritë negative, kryeministri është për me e zhvillu vendin, për me e qeverisë vendin. Në këtë rast, organi i akuzës ka diçka që i duhet kryeministri, qoftë në cilësinë e dëshmitarit, qoftë në cilësinë e të dyshuarit, i cili duhet t’i jap drejtim një çështjeje të caktuar”, ka deklaruar Tahiri pas mbledhjes së Kryesisë së Kuvendit të Kosovës.
Ndryshe, kryeministri i Kosovës, Albin Kurti, nuk është paraqitur të hënën si dëshmitar në Prokurorinë Speciale.
Zëdhënësja e Prokurorisë Speciale, Liridona Kozmaqi, ka thënë se janë njoftuar nga kabineti qeveritar se kryeministri Kurti është jashtë Kosovës dhe e ka të pamundur t’i përgjigjet sot thirrjes./teve1.info/
