Shefja e Grupit Parlamentar të Lëvizjes së Vetëvendosje, Mimoza Kusari-Lila në një konferencë për media ka deklaruar se veprimi i Partisë Demokratike të Kosovës në lidhje me dërgimin e 16 ligjeve në Gjykatën Kushtetuese, është për interesa personale dhe ato grupore.
Kusarit-Lila ka thënë se atë se çfarë kanë përvetësuar kundërligjshëm kur kanë qenë në pushtet duan të mbrojnë me mekanizma ligjor tash nga opozita.
“Atë se çfarë pamë sot me veprimin e fundit të Partisë Demokratike të Kosovës, pamë se kjo parti dhe ky grup parlamentar janë pozicionuar qartësi kundër qytetarëve të Republikës së Kosovës dhe interesit publik duke përdorur Gjykatën Kushtetuese për interesat e tyre personale dhe ato grupore, atë se çfarë kanë përvetësuar kundërligjshëm kur kanë qenë në pushtet duan të mbrojnë me mekanizma ligjor tash nga opozita”, ka thënë Kusari-Lila.
Duke referuar Ligjit për Byronë, Kusari-Lila ka thënë se nuk ka asnjë matematik që shpjegon pasurinë e tyre shumëmilionëshe në raport me të hyrat e tyre ndër vite.
Tutje, ajo tha se seanca 5 dhjetorit ka qenë seancë e hapur dhe kanë votuar shumica.
“Janë të gjithë të vetëdijshëm se kjo pasuri nuk mund të justifikohet mbi të ardhurat e të hyrat e secilit qytetar publik për arsye se ato të hyra dhe ato të ardhura janë publike dhe nuk ka asnjë matematik që e shpjegon pasurinë e tyre enorme, shumëmilionëshe në raport me të hyrat që i kishim ndër vite, 16 ligje sot që janë dërguar në Gjykatën Kushtetuese e kanë vetëm një qëllim mbrojtjen dhe zgjatjen e periudhës kohore nga zbatimi i Ligjit për Byronë për Konfiskimin e Pasurisë”, deklaroi ajo.
Ndryshe, Partia Demokratike e Kosovës ka dorëzuar 16 projektligje në Gjykatën Kushtetuese, që u miratuan në seancën e fundit.
Shefi i Grupit Parlamentar të PDK-së, Abelard Tahiri ka deklaruar se ata kanë paralajmëruar që do t’i dërgojnë 20 projektligje në Gjykatën Kushtetuese, mirëpo ka shtuar se në konsultim me ekspertët i kanë proceduar 16 prej tyre./teve1.info/
