Qytetarët në Serbi kanë vazhduar me protesta edhe gjatë së premtes kundër Partisë Progresive Serbe. Politikani socialdemokrat, Nenad Çanak, ka akuzuar partinë në pushtet se po përpiqet të qetësojë situatën me çdo mjet, nga blerja e deputetëve të opozitës e deri te frikësimi i aktivistëve.
Të premten, u bën katër javë nga tragjedia në Novi Sad ku humbën jetën 15 persona si pasojë se shembjes së tendës të një stacioni hekurudhor.
Qytetarët gjatë së premtes ne disa qytete të Serbisë kanë dalë sërish në rrugë për të protestuar kundër qeverisë.
Shumë serbë besojnë se korrupsioni i shfrenuar dhe marrëveshjet jo-transparente rezultuan në punë të ngadaltë gjatë rindërtimit dhe rrjedhimisht në shembjen e strukturës së çatisë të stacionit hekurudhor.
Politikani socialdemokrat, Nenad Çanak, thotë se tragjedia në Novi Sad është vetëm një prej skandaleve të shumta të qeverisë serbe.
“Tragjedia me shembjen e tendës në stacionin hekurudhor të Novi Sadit, në të cilën humbën jetën 15 persona, është vetëm një në serinë e aksidenteve për të cilat qytetarët gjithnjë e më shumë po fajësojnë drejtpërdrejt regjimin në Serbi. Korrupsioni dhe manipulimet në tenderët për projektet e ndërtimit të financuara nga shteti, favorizimi ndaj anëtarëve të partive në pushtet në dhënien e kontratave fitimprurëse dhe mbikëqyrja gjithnjë e më e dobët e punimeve të përfunduara të ndërtimit kanë filluar të përbëjnë një kërcënim në rritje për jetët e njerëzve”, politikani Nenad Çanak.
Çanak thotë se partia në pushtet është shumë e shqetësuar nga protestat andaj zyrtarët shtetëror po bëjnë përpjekje për t’i ndaluar ato.
Ai tregon se ka përpjeke nga pushteti për t’i blerë disa deputetë opozitarë të cilët gjithashtu janë të pakënaqur me situatën politike në Serbi.
“Regjimi tani po përpiqet të qetësojë situatën me çdo mjet të nevojshëm, nga blerja e deputetëve të opozitës deri te frikësimi i aktivistëve në rrugë përmes grupeve të organizuara të banditëve që veprojnë nën mbrojtjen e policisë. Synimi primar i regjimit është qartësisht ekspozita EXPO 2027, e cila pritet të ‘pastrojë’ shuma që arrijnë në disa miliardë euro (kostoja totale e parashikuar e ekspozitës përflitet të jetë 17 miliardë euro”, tha ai.
Pavarësisht presionit të madh nga qytetarët dhe partitë opozitare, Çanak nuk pret ndryshime politike së paku deri në pranverë.
Megjithatë ai shprehet i shqetësuar se gjatë kësaj periudhe të tensionuar në Serbi mund të ketë incidente të paparashikueshme.
Gjatë kësaj jave në Kuvendin e Serbisë, partitë opozitare kërkuan të diskutohet për mocion mosbesimi ndaj qeverisë./teve1.info/
