Rrezikun që mund ti kanoset Kosovës nga Serbia gjatë tranzicionit të pushtetit në Amerikë nuk e përjashton senatori, Richard Blumenthal, me ç’rast porositi SHBA-në ti mbajë sytë nga Kosova. Ndërkohë, sot në veri janë shfaqur postera me mbishkrimin “Po vijmë për Krishtlindje”.
Më 25 janar, timonin e Shtëpisë së Bardhë do ta marrë republikani, Donald Trump.
Por, deri tek tranzicioni i pushtetit dikush nga Senati i Shteteve të Bashkuara të Amerikës ka një brengë për Kosovën.
Andaj senatori amerikan, Richard Blumenthal, vendosi t’i dërgojë një letër sekretarit amerikan të shtetit, Antony Blinken ku kërkon që gjatë periudhës së tranzicionit të pushtetit në SHBA të ketë një fokus të veçantë ndaj Kosovës, sepse Serbia sipas tij vazhdon të paraqes rrezik për shtetin më të ri në Evropë.
Blumenthal ngriti disa shqetësime që lidhen direkt me sigurinë e Kosovës.
Duke folur për rrezikun nga Serbia, ai nënvizoi sulmin paramilitar serb që ndodhi më 24 shtator të vitit të kaluar në Banjskë të Zveçanit.
“Gjatë kësaj faze tranzicioni, ju kërkoj të përdorni të gjitha instrumentet që keni në dispozicion për t’u siguruar që Serbia të mbahet larg dhe e paaftë për të shkelur në territorin e Kosovës. Ne gjithashtu kërkojmë që ju t’i vazhdoni përpjekjet e kushtuara për normalizimin e marrëdhënieve mes Kosovës dhe Serbisë dhe pranimin e Kosovës në OKB”, ka thënë senatori amerikan.
Blumenthal, shprehet i shqetësuar se administrata Trump mund të mos fokusohet mjaftueshëm në normalizimin e marrëdhënieve mes Kosovës dhe Serbisë.
Kurse njohësi i çështjeve politike, Belgzim Kamberi, thotë se fokusi i administratës Trump tek këto dy shtete do të varet fillimisht në marrëdhëniet që ai do t’i krijojë me BE-në.
“Çështja e normalizimit të marrëdhënieve mes Kosovës dhe Serbisë përmes dialogut të Brukselit do të varet nga ajo se çfarë raporte të ndërtoj administrata Trump me Bashkimin Evropian në përgjithësi. Nga këto marrëdhënie trans-atlantike se si mendohet të veprojë Uashingtoni me Brukselin, e veçanërisht me Parisin e Berlinin atëherë do të shohim se çfarë ndikimi do të ketë edhe në Ballkanin Perëndimor”, vlerëson Kamberi.
Tutje, Kamberi thotë se ka ende shumë paqartësi në lidhje me mënyrën se si të veprojë Donald Trump, megjithëse ai nuk e përjashton si mundësi që lideri republikan të jetë më i përfshirë në çështjet e Ballkanit Perëndimor.
“Duke e parë presidentin Trump se si funksionon nuk përjashtohet si mundësi që administrata e tij të jetë direkt e përfshirë në rajon. Por, duke marrë parasysh konfliktet aktuale në Lindjen e Mesme dhe në Ukrainë ai edhe mund ta vazhdoj politikën e njëjtë sikurse administrata e kaluar amerikane që ia la në dorë këto çështje Bashkimit Evropian”, thotë ai.
Të martën në katër komunat e veriut të Kosovës janë shfaqur postera me ngjyrat e flamurit të Serbisë dhe me mesazhin “Po vijmë për Krishtlindje”.
Megjithatë për të nuk është hapur rast në polici.
Zëvendësdrejtori i Policisë së Kosovës, Veton Elshani ka thënë që pas konsultimit me prokurorin, është vendosur që rasti të mos hetohet, pasi “nuk ka rast”.
Edhe në të kaluarën në veri janë shfaqur postera me mbishkrimin kur ushtria e Serbisë të kthehet në Kosovë.
