Në bankat e shkollës dikur ishte nxënës.
Por tani hyn në klasë si mësues i filloristëve.
Tash e katër vjet, Shemsi Kodrolli nga komuniteti ashkali vijon punën si mësues klasor në shkollën ‘’Naim Frashëri’’ në Zaskok të Ferizajt.
Për të, kthimi përsëri në bankat e shkollës ishte ëndërr e realizuar.
“Unë më herët kam qenë i kyçur në një qendër të mësimit plotësues dhe prej aty ka fillu dëshira për me u marrë me nxënës, me punu me nxënës edhe kështu nga shkolla e mesme kam fillu studimet për mësuesi dhe tash punoj me nxënës dhe është një ndjenjë shumë e mirë, po ashtu është një mision i shenjtë e fisnik”, tha mësuesi klasor, Shemsi Kodrolli.
E përveç ndjesisë së mirë që i përcjell ky profesion – për Kudrollin është i rëndësishëm edhe raporti me kolegët.
“Raportet kanë qenë shumë të mira, kanë qenë shumë të gëzuar dhe të lumtur me mu, poashtu edhe krenar disa prej mësimdhënësve të cilët kanë qenë këtu sepse disa kanë dalë edhe në pension po n’përgjithësi më kanë prit të gjithë mirë dhe me t’gjithë kaloj shumë mirë”, tregon ai.
Shemsi Kodrolli është një prej dy mësuesve të komunitetit ashkali që punon si mësimdhënës në komunën e Ferizajt.
