Të shtunën në mëngjes në faqen zyrtare të përfaqësueses së Rumanisë në “facebook” është bërë një postim falënderues për tifozët rumunë.
Ndeshja e së premtes mbrëma mes Rumanisë dhe Kosovës u ndërpre në minutat shtesë. Pas thirrjeve “Serbia, Serbia” të tifozëve rumunë, lojtarët e Kosovës kanë braktisur fushën dhe kanë refuzuar të kthehen, ndonëse këtë ua kërkoi arbitri. Arbitri doli në fushë dhe dha shenjë për fundin e ndeshjes, që zyrtarisht u vlerësua e ndërprerë, përkatësisht e braktisur. Rezultati ishte 0:0, kurse vendimi tani i takon UEFA-s.
“Ekipi nacional i Rumanisë dëshiron të falënderojë ata që ishin prezentë për përkrahjen e jashtëzakonshme dhe për sjelljet e tyre në ndeshjen ndaj Kosovës. Ndeshja do të mbetet në kujtesë jo vetëm që zgjati tri orë, por si shembull i unitetit dhe solidaritetit. Ndeshja ishte sfidë për të gjithë të përfshirët, por së bashku, lojtarët dhe tifozët, dëshmuan që e respektojnë dhe e duan sportin”, shkruan në postimin e përfaqësueses rumune.
Rumunët kanë falënderuar tifozët “që kanë kuptuar qëllimin e përbashkët të ndeshjes”.
“Trekolorët po ashtu çmojnë faktin që tifozët menaxhuan aq sa ishte e mundur mos të përgjigjen në sfidat nga mysafirët tanë. Është për keqardhje veprimi i ekipit mysafir, i cili zgjodhi të largohej nga fusha pa pëlqimin e arbitrit, duke refuzuar ta mbyllë ndeshjen në fushë, në frymën e lojës së ndershme. Kjo reflekton mungesë respekti jo vetëm për futbollin, por edhe për profesionin e futbollistit”, shkruan në postimin e rumunëve.
Drejtori teknik i federatës rumune, Mihai Stoichita, ka thënë se veprimi i Kosovës duket i paramenduar.
