Familja e Faton Hajrizit ka paditur kryeministrin Kurti, zëvendëskryeministrin Bislimi dhe deputetin e VV-së, Arbër Rexhaj, për siç thanë atam gjuhë fyese dhe urrejtje. Sipas familjes, ata në deklaratat e tyre publike, e cilësuan Faton Hajrizin si kriminel.
Ishte kryetemë disa muaj më parë.
Për Faton Hajrizin, nuk u kursyen nga deklaratat publike bartës të funksioneve të institucioneve publike.
Për cilësimet kundrejt Faton Hajrizit si kriminel, familja Hajrizi i është drejtuar organeve të drejtësisë.
“Kjo padi ka të bëjë me të paditur zyrtarë të lartë të institucioneve publike, bëhet fjalë për Bislim Bislimi, zëvendëskryeministër, kryeministri dhe një deputet i partisë Lëvizja Vetëvendosje, të cilët kanë përdorur epitete në konotacion negative kanë njollosur familjen Hajrizi. Duhet ditur se përdorimi i shprehjes ofenduese, fyese me terminologji kriminel nuk njihet në kod dhe në literaturë.” “deputeti nga radhët e LVV, Arbër Rexhaj, është ai që haptazi në rrjetet sociale, ka përdorur epitete negative”, tha avokati i familjes, Gent Gjini.
Për vëllaun e Faton Hajrizit, më shqetësuese ishin deklaratat që bëheshin në lidhje me vrasjen e një ushtari rus, për të cilën vepër ai kishte vuajtur dënimin me burg.
“Mu më vret më së shumti qeky, që u dal dhe ka deklaru “e di unë kush e ka vra rusin, nuk e ka vra Faton Hajrizi, – ka thanë, por e di unë kush e ka vra. E qeky duhet me dhanë përgjegjësi kush është ai person që e ka vra rusin, e vllau jem i majti 20 vjet burg. Mas 20 vjete po del e po thotë e di une kush e ka vra“, tha Artan Hajrizi.
Ata paralajmëruan padi tjetër edhe për ministren e Drejtësisë, Albulena Haxhiu.
Për çdo tejkalim të lirisë së shprehjes, bazuar në deklarimet publike, mbetet të shihet në proces gjyqësor.
“Epilogu i organeve të zbatimit të ligjit, me theks Gjykatës, do të jetë ai që do ta përcaktojë qartë, mirëpo nëse eventualisht mund të ketë ndonjë tejkalim të cilësimeve që janë bërë të të ndjerit, do të jetë procesi gjyqësor ai që do ta determinojë në rast se ka pasur ose jo, tejkalim të cilësimeve që janë bërë qoftë nga ana e kryeministrit, zëvendësit ose edhe personave të tjerë”, deklaroi juristi, Ardian Bajraktari.
Pas arratisjes nga burgu në Kosovë, Faton Hajrizi u arratis edhe nga Kosova, ku për disa ditë dyshohet të ketë qëndruar në Serbi, ku edhe dyshohet të ketë vrarë një polic serb.
E ditë më vonë në korrik të këtij viti u vra nga autoritet serbe. /teve1.info/