Deputeti i Kuvendit të Kosovës, Behgjet Pacolli i ka replikuar sërish zëdhënësit të Qeverisë, Përparim Kryeziut rreth çështjes së bisedave me kryeterroristin Millan Radoiçiqin.
Pacolli insiston se ai ka biseduar me Radoiçiqin në prezencë të kryeministrit Albin Kurti dhe presidentes Vjosa Osmani.
Pacolli në një postim me shkrim në Facebook, ka thënë se dikush në emër të Qeverisë po tenton ta shtrembërojë të vërtetën.
Derisa, Pacolli potencoi se ka dëshmi dhe njerëz që vertetojnë deklaratën e tij.
“Prapë po ju them, mos insistoni ma tutje, dikush në emër të qeverisë po e shtrembëron të vërtetën, (nuk desha të them që po gënjen). Për këtë cka kam thënë ka dëshmi dhe njerëz të tjerë. Mos harroni se po tregoheni shumë të ligë dhe jo mirënjohës!”, shkroi ai.
Pacolli për Tëvë1 të mërkurën ka thënë se një ditë para se Vjosa Osmani të zgjidhet presidente e shtetit, ai ka folur me Milan Radoiçiqin në prezencën e saj dhe të kryeministrit Albin Kurti. Ai thotë se në këtë bisedë telefonike u peshkua një deputet për votimin e saj dhe praktikisht ajo u arrit.
Mirëpo, zëdhënësi i Qeverisë së Kosovës, Përparim Kryeziu thotë se deklarata e Pacollit nuk është e vërtetë./teve1.info/
