75 mijë euro të padeklaruara i ka gjetur Policia e Kosovës, të martën gjatë kontrollimit të një automjeti në pikëkalimin kufitar në Merdare.
Në njoftim thuhet se, në automjet ndodheshin tre persona tek të cilët janë janë gjetur nga 10 mijë euro bankënota, ndërsa gjatë kontrollit të mëtejshëm në një qese plastike të fshehur nën ulësen e prapme është gjetur edhe një shumë prej 45 mijë euro bankënota të padeklaruara.
Po ashtu bëhet e ditur se, mjetet financiare të padeklaruara janë sekuestruar dhe i janë dorëzuar agjensionit kompetent për procedurë të mëtejme.
“Policia Kufitare, në kuadër të planit operativ me karakter ndërkombëtar, realizuar në bashkëpunim me Frontex, “Ditët e Veprimit të Përbashkët – JAD Mobile 7”, me datën 15.10.2024, në pikëkalimin kufitar në Merdare, në dalje të RKS-së, gjatë kontrolleve të shtuara është bërë kontrollimi i automjetit me targa RKS, në të cilin gjendeshin tre persona meshkuj kosovarë. Gjatë kontrollit të automjetit janë gjetur 75 000 (shtatëdhjetë e pesë mijë) euro bankënota të padeklaruara. Fillimisht, tek tre personat janë gjetur nga 10 000 (dhjetë mijë) euro bankënota, gjersa gjatë kontrollit të mëtejshëm në një qese plastike të fshehur nën ulësen e prapme të automjetit është gjetur edhe një shumë prej 45 000 (dyzet e pesë mijë) euro bankënota të padeklaruara. Mjetet financiare të padeklaruara janë sekuestruar dhe i janë dorëzuar agjensionit kompetent për procedurë të mëtejme”, thuhet në njoftimin e Policisë./teve1.info/
