Kombëtarja e Kosovës U21, synon që ciklin kualifikues për Evropianin e vitit të ardhshëm ta mbyll me fitore.
Ndeshjen e fundit në kuadër të kualifikimeve për “Euro 2024”, “Dardanët” e rinj do ta luajnë në Estoni.
Kjo përballje zhvillohet sot në Tallinn prej orës 17:00 dhe i takon Grupit D, të cilit i prinë Gjermania me 25 pikë të grumbulluara.
Futbollistët e trajnerit Afrim Tovërlani kanë tubuar 12 pikë nga 9 ndeshje të luajtura në këto kualifikime dhe në Estoni kanë udhëtuar të motivuar për fitore.
Në fakt, Kosova U21 synon të reagoj pas humbjes që e pësoi javën e shkuar në Prishtinë nga Polonia dhe për të regjistruar fitoren e katërt në këtë cikël kualifikues.
Të premten e shkuar, Kosova U21 pësoi thellë nga Polonia që fitoi me rezultatin 4:0 për t’ia shkaktuar “Dardanëve” të rinj humbjen e tretë në këto kualifikime, ku kanë regjistruar edhe tri barazime e tri fitore.
Kosova U21 në ndeshjen e parë ka fituar 2:0 ndaj Estonisë dhe llogaritet favorite, duke pasur parasysh renditjen e tyre në tabelë, ku zënë vendin e parafundit me vetëm katër pikë.
Estonia U21 ka vetëm një fitore dhe një barazim karshi shtatë humbjeve në këtë cikël kualifikues të kësaj grupmoshe.
