Deputeti i Lidhjes Demokratike të Kosovës (LDK), Anton Quni, ka deklaruar se ushqimi duke mos qenë emergjencë e papritur mund të planifikohet me kalendar dhe transparencë.
Quni, në seancën e cila po zhvillohet në Kuvend lidhur me çështjen e ushqimit për ushtarët e FSK-së, ka thënë se Ministria e Mbrojtjes nuk ka arritur që të planifikojë përfundimin e kontratës.
“Ministria e Mbrojtjes nuk ka arritur që të planifikojë përfundimin e kontratës. Ushqimi nuk është një emergjencë e papritur, është diçka që mund të planifikohet me kalendar dhe transparencë. A po e bën kjo Qeveri me të vërtetë këtë detyrë jetike? Pse po dëgjojmë ende raportime për standarde, a po përdorin kompani të specializuar”, ka thënë tutje Quni në seancën që po mbahet në Kuvend për çështjen e ushqimit për ushtarët e FSK-së.
Deputeti i Lëvizjes Vetëvendosje, Mefail Bajqinovci, në një konferencë të përbashkët për media me deputetin e VV-së, Enver Dugolli ka folur për çështjen e shujtave për ushtarët e Forcës së Sigurisë së Kosovës, ku ka thënë se ka sulme ndaj Ministrisë së Mbrojtjes dhe se sipas tij, e gjithë kjo çështje është propagandë, e shpifje.