Kryetari i Zubin Potokut, Izmir Zeqiri, ka reaguar lidhur me situatën e fundit rreth anëtarësimit të komunave veriore në Asociacionin e Komunave.
Ai ka publikuar dokumentin ku tregohet anëtarësimi i komunës së Zubin Potokut në AKK dhe ka thënë se nuk ka nevojë për procedura të tjera administrative.
“Ne do të vazhdojmë të sillemi konform përgjegjësive që na takojnë si Komunë. Mungesa ime në takimin e Kryetarëve të Asociacionit të Komunave të Kosovës ka qenë e paralajmëruar më parë në organet e Asociacionit”, ka shkruar ai në Facebook.
Kryetari i Komunës së Kamenicës, Kadri Rrahimaj, të enjten përmes një postimi në Facebook, ka thënë se komunat e veriut të Kosovës – Leposaviqi, Zveçani, e Zubin Potoku nuk janë pjesë e Asociacionit të Komunave të Kosovës.
Ai ka akuzuar kryetarin e komunës së Ferizajit, Agim Aliun dhe kryetarin e Asociacionit të Komunave të Kosovës, Sazan Ibrahimin që nuk kanë lejuar asnjëherë Komunat e Veriut të Kosovës të bëhen pjesë e AKK-së.
“Komunat e Veriut të Kosovës – Leposaviqi, Zveçani, e Zubin Potoku nuk janë pjesë e Asociacionit të Komunave të Kosovës. Ato me 14 dhe 15 shtator të vitit 2023 kanë votuar në kuvende komunale për tu bërë pjesë e AKK-së. Përkundër që vendimi është vlerësuar si i ligjshëm në MAPL, Agim Aliu dhe Sazan Ibrahimi nuk kanë lejuar asnjëherë Komunat e Veriut të Kosovës të bëhen pjesë e AKK-së. Personalisht kam kërkuar në rrugë zyrtare të na dërgojnë dëshminë e fletës së anëtarësisë, siç e ka çdo komunë anëtare, ata janë pergjigjur se se një gjë të tillë nuk e kanë. Fakti i dytë është se në asnjë raport të auditmit nuk mund të gjeni se këto komuna janë anëtare. Në raport paraqitet lista e anëtarëve dhe participimi i komunave. Fakti i tretë, që në raportin që ka sjellur vet sot bordi, shihet se Komunat e Veriut të Kosovës nuk janë anëtare”, ka shkruar ai. Ku po dëshirojnë t’i anëtarësojnë Komunat e Veriut të Kosovës, kasta e vjetër politike?”, ka shkruar ai./teve1.info/
