10 Tetori është Dita Botërore e Shëndetit Mendor.
Këtë vit është vënë theksi tek lidhja jetike në mes të shëndetit mendor dhe punës.
E për këtë, hulumtimi i fundit në Kosovë është bërë në vitin 2022.
Drejtori i Klinikës së Psikiatrisë në QKUK, Faton Kutllovci, tha për televizionin se niveli i stresit ka qenë diku 45%.
“Kemi rritje të këtij fenomeni në të gjitha institucionet apo vendet e punës e në veçanti në institucionet shëndetësore. Në bazë të disa hulumtimeve që kanë bërë edhe shoqatat e ndryshme në Evropë niveli i stresit për shkak të punës është diku 25% ndërsa në hulumtimin e vitit 2022 që është i vetmi që është realizuar në Kosovë nga Shoqata e Infermierëve të Kosovës niveli i stresit ka qenë diku 45%”, tha ai.
Kutllovci apeloi që të gjitha mediet të kenë kujdes në lidhje me lajmet që mund të nxisin përjetimin e frikës.
Ndër të tjera, në këtë tryezë përveç psikiatërëve e psikologëve, ishte i pranishëm edhe specialisti i neuropsikiatrisë, Jusuf Ulaj, i cili vjen nga zyra e kryeministrit.
“Në nivel qeveritar është duke u punuar edhe në këtë drejtim. Shërbimet e shëndetit mendor në vendin tonë janë më të përparuara sesa në vendet e regjionit. Për fat të mirë Kosova nuk ka spitale psikiatrike pra njerëzit që kanë probleme me shëndetin mendor trajtohen në komunitet”, tha ai.
Ulaj tha se ligji për shëndetin mendor do të ndikojë për trajtimin më specifik për njerëzit që kanë probleme me shëndetin mendor.
“Ligji për shëndetin mendor i cili i takon fushës sonë, janë punuar dy drafte deri tani, tani është drafti i fundit po ashtu është duke u rishikuar e po besoj që shumë shpejt do të kalojë në procedura të tjera, që ka me i trajtu në mënyrë më specifike sidomos problemet e trajtimit të pavullnetshëm të njerëzve që kanë probleme të shëndetit mendor”, tha Ulaj.
Sipas burimeve të televizionit, Klinika e Psikiatrisë në QKUK gjendet në kushte të vështira, ku që nga ndërtimi i saj asnjëherë nuk është investuar në këtë objekt.
