Në Institutin Albanologjik në Prishtinë të enjten u promovua monografia “Kadri Avdiu, një jetë në shërbim të atdheut”. Shtjellohet historia e fshatit Bellopojë dhe roli i Kadriut në luftën e UÇK-së.
Bashkëluftëtarët e përfaqësues institucionesh u mblodhën në Institutin Albanologjik në Prishtinë.
Kjo për të nderuar veprën e një figure të shquar të luftës për çlirimin e Kosovës, Kadri Avdiut.
Për përkushtimin e Avdiut ndaj çështjes kombëtare, të enjten u promovua monografia “Kadri Avdiu – Një jetë në shërbim të atdheut.”
Në fjalë rasti foli edhe Shefi i Katedrës së Historisë në Institutin Albanologjik, dr. Nuridin Ahmeti.
E një vlerësim të përmbajtjes dhe kontributit të librit e dha dr. Sadri Rexhepi.
Kurse për analizën dhe rëndësinë e monografisë foli profesor Bedri Tahiri.
Një fjalë rasti e dha ish-Komandanti i Zonës së Llapit, Rrustem Mustafa.
“Unë e njoh për nga afër, nuk ka diçka të mirë që ka bë dikush për atdheun e që se ka bo Kadriu. Faleminderit Kadri…”, tha ai.
E familjes së Kadriut, autori i Monografisë “Një jetë në Shërbim të Atdheut”, Zymer Mehani iu drejtua me ca fjalë për të.
Libri është i ndarë në nëntë kapituj duke pasqyruar historinë e fshatit Bellopojë dhe rolin e Kadriut në luftën çlirimtare të Kosovës.
