Prokuroria Themelore në Prizren, të hënën ka njoftuar se, ka ngritur aktakuzë kundër të pandehurit B.U., cili gjendet në paraburgim nga 15 korriku, si i dyshuar për kryerjen e veprave penale “vrasje në tentativë” dhe “armëmbajtje pa leje”.
Në aktakuzë thuhet se, i akuzuari me 17 maj të këtij viti, në fshatin Nishec të Prizrenit, ka tentuar ta privojë me dashje nga jeta J.A., pasi i njëjti nuk ka poseduar shumën prej dymijë e pesëqind eurosh të cilën B.U. ia kishe kërkuar në formë të borxhit.
“Sipas aktakuzës, i akuzuari B.U., me datë 17.05.2024, rreth orës 17:30 min, në fshatin Nashec të Komunës së Prizrenit, me dashje tenton ta privojë nga jeta personin tjetër, në atë mënyrë që pasi takohet me viktimën J.A., paraprakisht kërkon nga i njëjti t’ia jap një shumë parash prej 2,500.00 € (Dymijë e pesëqind euro) në formë të borxhit dhe pasi viktima i thotë se nuk e posedon një shumë të tillë, i njëjti nxjerr pistoletën dhe nga dritarja e automjetit të markës ‘’ËV Passat CC’’ , e cila ka qenë e hapur, shkrep në drejtim të viktimës, me ç’rast e plagos në këmbën e tij të djathtë dhe largohet nga vendi i ngjarjes, si pasojë e lëndimeve të marra, viktima i nënshtrohet tretmanit mjekësor pranë Repartit Kirurgjik të Spitalit të Përgjithshëm të Prizrenit. Me këto veprime, i njëjti ka kryer veprën penale “Vrasja në tentativë””, thuhet në aktakuzë.
Po ashtu, në aktakuzë bëhet e ditur se , i akuzuari B.U., mban në pronësi, kontroll dhe posedim armë në kundërshtim me ligjin e zbatueshëm për armët, dhe me këto veprime ka kryer veprën penale “Mbajtja në pronësi, kontroll ose posedim të paautorizuar të armëve”.
Prokurori i çështjes me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartëcekur për veprat penale për të cila akuzohet të shpallet fajtor dhe të dënohet sipas ligjit./teve1.info/