Opozita në Skenderaj akuzon komunën për mashtrim dhe eskivim të ligjit lidhur me pronën publike e cila u dha për ndërtim të banesave dhe lokaleve afariste. Derisa nga komuna e mohojnë këtë gjë, duke theksuar se gjithçka ka shkuar sipas rregullave ligjore.
Një parcelë u nda për ndërtim të banesave dhe lokaleve afariste.
Vendimin për këtë e mori kuvendi komunal në Skenderaj.
Kështu, prona publike në sipërfaqe prej 3000m2 iu dha për shfrytëzim afatgjatë p=r 99 vite të vetmit ofertues që kishte aplikuar.
Por për ndërtimin e zonës ndërtimore ka kundërshtime nga opozita.
“Ajo çka nuk pajtohemi ne si Vetëvendosje është që prona komunale me u dhënë për banesa. Veçmas duke e ditë faktin që komuna jonë ka mungesë të pronave. Dy çerdhet që janë duke u ndërtu aktualisht janë duke u ndërtuar në oborret e shkollave, në afërsi 10m prej shkollave sepse nuk kemi prona për çerdhe e për çështje tjera që kanë të bëjnë me interesin publik” tha Hysni Mehani nga VV-ja.
Madje sipas Mehanit kjo parcelë po jepet në kundërshtim me ligjin.
“Veç vlera e tokës kushton 1 milion euro, kjo pronë po jepet për 500 mijë euro edhe përfitues është veç privati. Komuna ka mashtru duke e paraqitë si numër të punësuarve nga investimi punëtorët që kanë me ndërtu banesën, e mbas tri vjete këtu nuk mbetet asnjë i punësuar, rrjedhimisht këta e paraqesin t’u provu me mashtru dhe me bo një eskivim të ligjit”, tha Mehani.
Prandaj ai bëri kërkesë për interpretim ligjor në MAPL.
“Natyrisht është obligim ligjor që të pritet sepse MAPL le të themi i validon vendimet e kuvendeve komunale në rast se të njëjtat janë në pajtueshmëri me ligjin ose jo”, tha avokati Ardian Bajraktari.
Mirëpo se gjithçka është kryer sipas rregullave ligjore e thotë kryetari i komunës së Skenderajt, Fadil Nura.
“E kemi pritë edhe konfirmimin e ligjshmërisë së MAPL-së dhe çdo procedurë është ndjekur me përpikërinë më të lartë. Nëse opozita është pjesë e kuvendit i ka shtru pyetjet e tyre dhe nuk kam pa që kanë pasë argumente, sido që të jetë unë ia njoh opozitës të drejtën deri në qiell të kundërshtojë por nuk mund të mbesim peng i askujt, duhet me ec përpara duke respektu në plotni interesin publik të komunës”, tha Nura.
Sipas vendimit të komisionit të kuvendit komunal, kjo pronë e paluajtshme do të shndërrohet në një pronë me ndërtim, gjelbërim dhe park.
