Deputeti i Partisë Demokratike të Kosovës, Ferat Shala, e ka akuzuar qeverinë aktuale të Kosovës për mostransparencë në komunikim jo vetëm ndaj faktorit të brendshëm, por siç ka thënë ai edhe ndaj faktorit ndërkombëtar, lidhur me çështjen e CEFTA-s.
Shala ka thënë se ata kanë qenë në “terr informativ” për sa i përket arsyeve që e kanë sjellë Kosovën në situatën në të cilën ndodhet momentalisht.
“Qeveria nuk ka qenë sa duhet efikase, nuk ka qenë sa duhet eficiente, nuk ka qenë sa duhet transparente sa i përket komunikimit jo vetëm të faktorit të brendshëm që në njëfarë forme kemi qenë në terr informativ se çka po ndodh ose cilat janë arsyet që kemi ardhur deri te kjo situatë por edhe me faktorët relevantë ndërkombëtar të Bashkimit Evropian dhe të organizatës së CEFTA-s”, ka thënë ai në emisionin “Ditari” në tëvë1.
Ndërsa, për kërkesën e Gjermanisë ndaj Kosovës që të hiqet ndalesa për mallrat serbe nëse dëshiron që të bëhet pjesë e CEFTA-s, Ferati ka thënë se nuk mund ta komentojë, pasi sipas tij vetë Kosova është fajtore për sanksionimin nga ana e BE-së.
“Nuk mund të komunikojë apo të interpretojë kërkesat e shteteve të caktuara të Bashkimit Evropian sepse ne parimisht ne e kemi sjellë situatën ku sot Kosova është nën sanksione të Bashkimit Evropian. Pra, Kosova si asnjëherë më parë jo meritueshëm është në kuadër të sanksioneve të BE-së”, ka shtuar Ferati.
Samiti i radhës i Procesit të Berlinit do të mbahet më 14 tetor në Berlin të Gjermanisë.
Emisari gjerman për Ballkanin Perëndimor, Emanuel Sarrazin, të mërkurën gjatë qëndrimit në Kosovë, edhe njëherë i ka kërkuar Kosovës largimin e masës për mallrat ndaj Serbisë para Procesit të Berlinit.
Ndërsa, në një përgjigje nga Qeveria, për Tëvë1 kanë thënë se janë duke punuar që 10 vjetori i Procesit të Berlinit të jetë i suksesshëm.
Gjermania ripërsëritë kërkesën për CEFTA-n, Qeveria thotë se po punojnë për zgjidhje
