Zëvendëskryeministri i Parë për Integrim Evropian, Zhvillim dhe Dialog i Kosovës, Besnik Bislimi të martën ka pritur në takim drejtuesin e Ekipit Ekonomik Gjerman, Ricardo Giucci dhe përfaqësues të Ekipit.
Sipas komunikatës, në këtë takim është diskutuar për ecurinë zhvillimore të vendit si dhe indikatorët ekonomikë.
“U theksua rritja ekonomike që ka njohur Kosova në tri vitet e fundit, rritja e investimeve të huaja direkte duke qenë më e larta në rajon, rritja e të hyrave, krijimi i vendeve të reja të punës e ulja e inflacionit mes tjerash”, thuhet në komunikatë.
Po ashtu, gjatë takimit zëvendëskryeministri e ka cilësuar zhvillimin e Kosovës si një histori suksesi dhe unike duke u bazuar në gjithë indikatorët ekonomikë.
Ndërsa, Giucci, ka vlerësuar politikat ekonomike të ndërmarra nga qeveria dhe zhvillimin e hovshëm ekonomik të Kosovës.
“Në takim u diskutua dhe për rëndësinë e benefitet e Tregut Unik të Pagesave në Euro (SEPA), si vazhdimësi e diskutimit të mbajtur edhe javën e kaluar në Europe House, ku zëvendëskryeministri shprehu përsëri punën dhe hapat që po bën Qeveria në lidhje me avancimin drejt anëtarësimit në SEPA”, theksohet në komunikatë./teve1.info/
