Zëvendëskryeministri i Parë për Integrim Evropian, Zhvillim dhe Dialog i Republikës së Kosovës, Besnik Bislimi, të hënën, ka pritur në takim ambasadorin jorezident të Irlandës për Kosovë, Ragnar Almqvist.
Në komunikatë thuhet se, në takim Bislimi dhe Almqvist, kanë biseduar rreth fuqizimit të marrëdhënieve e bashkëpunimit bilateral mes dy shteteve në fusha me interes të përbashkët.
“Fokusi u përqendrua në mundësinë e kultivimit të shkëmbimit tregtar, investimeve ekonomike dhe projekteve kulturore midis dy vendeve tona, me theks në rrafshin e shkëmbimit të përvojave dhe në angazhimin e diasporës”, theksohet në njoftim.
Po ashtu, Bislimi, gjatë takimit e ka njohur ambasadorin edhe me aktualitetin e zhvillimet në vend, si dhe progresin që siç thuhet në komunikatë, ka njohur Kosova në më shumë se tri vite të qeverisjes Kurti, duke theksuar indikatorët ekonomikë.
“Zëvendëskryeministri Bislimi e falënderoi ambasadorin për takimin e bisedën, duke shtuar se Kosova mbetet e gatshme për bashkëpunim të ngushtë me Irlandën e thellim të mëtejmë të marrëdhënieve mes nesh”, thuhet në vijim të komunikatës.
Irlanda do të marrë përsipër edhe presidencën e BE-së në gjysmën e dytë të vitit 2026./teve1.info./
