Ministrat e Ekonomisë së Ballkanit Perëndimor u mblodhën në Berlin për të shënuar dhjetëvjetorin e Procesit të Berlinit dhe për të vendosur agjendën e ardhshme.
Në konferencën e organizuar nga Ministri Federal i Çështjeve Ekonomike dhe Veprimit Klimatik, Dr. Robert Habeck mori pjesë Danijela Gacevic, Drejtoresha në Detyrë e Sekretariatit të CEFTA-s.
“Konferenca, që mblodhi së bashku ministra, liderë të biznesit dhe ekspertë ndërkombëtarë, u përqendrua në vlerësimin e progresit drejt krijimit të Tregut të Përbashkët Rajonal (CRM). Mundësitë ekonomike të rajonit, teksa afrohet me integrimin në BE, ishin në qendër të diskutimeve, së bashku me dhjetë marrëveshje të rëndësishme të lehtësimit të tregtisë së CEFTA-s që janë në pritje të miratimit”, thuhet në komunikatë.
Derisa, Gacevic ka thënë se miratimi i marrëveshjeve do të jetë një hap i rëndësishëm drejt një Tregu të Përbashkët Rajonal në përputhje me BE-në.
“Gacevic theksoi rëndësinë e këtyre vendimeve për arritjen e lirisë së plotë të lëvizjes së mallrave dhe shërbimeve: “Miratimi i këtyre marrëveshjeve do të jetë një hap i rëndësishëm drejt një Tregu të Përbashkët Rajonal në përputhje me BE-në. Secila prej tyre është një paketë përfitimesh për bizneset dhe konsumatorët që do të na afrojë, jo vetëm me njëri-tjetrin, por edhe me BE-në. Prandaj, është thelbësore që t’i miratojmë sa më shpejt”, theksoi ajo.
Sipas komunikatës, marrëveshjet në kuadër të CEFTA-s miratohen nga Komiteti i Përbashkët në formën e vendimeve, protokolleve shtesë si dhe rekomandimeve.
“Marrëveshjet në kuadër të CEFTA-s miratohen nga Komiteti i Përbashkët në formën e Vendimeve, Protokolleve Shtesë ose Rekomandimeve. Aktualisht, dhjetë marrëveshje të tilla janë në pritje të miratimit në fusha të ndryshme: tregtia elektronike, shërbimet e shpërndarjes së pakove, parandalimi i bllokimit të pajustifikuar gjeografik, kualifikimet profesionale, pronësia intelektuale, menaxhimi i rrezikut, shërbimet e agjencive të udhëtimit, sigurimi i motorëve, njohja e operatorëve ekonomikë të autorizuar dhe zgjidhja e mosmarrëveshjeve tregtare”, thuhet ndër të tjera./teve1.info/
