Në Gjykatën e Apelit të Kosovës është njoftuar familja dhe avokati i të vrarit, Lulzim Fejzullahut, se seanca është anuluar.
Sipas gjykatës, siç njofton për tëvë1 avokati Tomë Gashi, ditën e djeshme ka pranuar një email nga njëri prej avokatëve që përfaqësojnë të miturit se ndodhet në një tjetër seancë.
E njoftimin për shtyrjen e seancës, familja e të miturit e ka kuptuar vetëm pasi ka ardhur në seancën e cila parashihej të fillonte në 10:30.
‘’Sa herë që familjarët e Lulzimit vijnë në këto gjykata, ndihen sipas tyre edhe të keqtrajtuar dhe që dhimbja iu shtohet’’, thotë Gashi.
Gashi tha se Gjykata e Apelit duhet të jetë serioze, që t`i njoftojë palët që të mos vijnë.
‘’Do të duhej gjykata të jetë pak më serioze, Gjykata e Apelit po flas në këtë rast, që nëse merr njoftime zyrtare, qoftë në formë të emaileve apo avokatëve apo kujtdo tjetër të palëve në procedurë, që palët tjera t’i njoftojë që të mos vijnë’’ – ka thënë Gashi.
Tëvë1 gjatë ditës do të provojë të kontaktojë me Gjykatën e Apelit për mos-njoftimin e palëve për anulim të seancës.
Seanca e radhës është shtyrë me datën 25 shtator nga ora 11:20./teve1.info/
