Pamflete me mbishkrime kërcënuese janë shfaqur në veri të vendit, e lidhur me këto pamflete, në emisionin “Ditari” në Tëvë1 ka folur njohësi i sigurisë, Fatmir Qollaku, i cili i ka vlerësuar si reagime mllefi dhe propagandë të disa individëve të lidhur me bandat kriminale në veri, pas bërjes publike të aktakuzës së Banjskës.
Qollaku, po ashtu, konsideron se këto pamflete ndërlidhen edhe me paralajmërimin e Vuqiqit dhe një fazë të këtyre individëve që mendojnë se duhet të ndërmerret diçka.
“Është një solidaritet i shprehur publikisht dhe një reagim i strukturave të caktuara, të cilat janë të afërta me çështjet kriminale dhe me Radojiqiqin dhe për të dëshmuar një mbështetje morale dhe një gatishmëri kinse të nivelit të lartë dhe operativ nëse është nevoja do të kyçen në aksione rezistente por që unë nuk i shoh më shumë se një propagandë më shumë se një fazë e parë e një lufte psikologjike speciale pas bërjes publike të aktakuzës së Banjskës. Realisht këto ndërlidhen edhe me paralajmërimin e Vuqiqit dhe janë të sinkronizuara si një front i ri tani si një fazë që duhet të ndërmerret dicka për të tejkaluar gjendjen ekzistuese gjithnjë sipas tyre”, ka thënë Qollaku në emisionin “Ditari” në tëvë1.
Sipas Qollakut, te këto veprime nuk ka asgjë shqetësuese, pasi bëhen thjesht për të ngjallur frikë te qytetarët si dhe për të përcjellur mesazh te strukturat e sigurisë.
“Në esencë nuk ka asgjë shqetësuese, asgjë që do të duhej realisht të na frikësojë sepse bëhet fjalë për përpjekje të luftës psikologjike për të hapur frikë, pasiguri te qytetarët atje si dhe për të përcjellur mesazh te strukturat tona të policisë dhe të tjera struktura të sigurisë që kinse bëhet fjalë për një organizim serioz të një rezistence e cila do të duhej t’i përgjigjej aksionit policor”, ka shtuar ai.
Për Qollakun, aktualisht mes Kosovës dhe Serbisë bëhet eksluzivisht luftë politike përmes siç ka thënë Qollaku ‘një diplomacie të thellë të Serbisë dhe një papjekurie të Kosovës’.
“Tani bëhet ekskluzivisht luftë politike mes Serbisë dhe Kosovës përmes një diplomacie të zhdëërvjelltë dhe të thellë të Serbisë dhe të një jo pjekurie të mjaftueshme të Kosovës në planin politik. Lufta politike është më e thëllë sesa që duket dhe epilogu i saj do të jetë me peshë të madhe për Kosovën nëse nuk dihet të luhet politikisht si duhet”, ka theksuar Qollaku./teve1.info/
