Sigal Prishtina apo Trepça? Cila skuadër do të triumfoj në Superkupën e Kosovës në basketboll?
Kjo është dilema që do të shuhet sonte në mbrëmje kur Sigal Prishtina dhe Trepça, do të përballen në finalen e Superkupës së Kosovës.
Finalja e madhe do të luhet në palestrën “Sezai Surroi” në Prizren, ku edhe është mbajtur turneu i Superkupës për sezonin 2024/25, ndërsa nis në orën 20:00.
Pritet një ndeshje e fortë dhe interesante në parket, ndërsa edhe tribunat sipas të gjitha gjasave do të jenë të mbushura me adhurues të basketbollit.
Trepça është fituese në fuqi e Superkupës dhe sigurisht se synon ta mbroj këtë trofe, ndërsa Sigal Prishtina po e kërkon këtë sukses për herë të parë pas vitit 2022.
Skuadra nga Mitrovica po e kërkon triumfin e tretë në Superkupë, ndërsa Prishtina për herën e nëntë.
Bazuar në formën e treguar në këtë turne, i cili nisi vikendin e shkuar, Trepça vlerësohet favorite, duke pasur parasysh edhe faktin se sezonin e shkuar i fitoi të gjithë trofetë.
Krahas këtij suksesi historik, Trepça sezonin e shkuar ka pasur bilanc fantastik përball Prishtinën, të cilën e ka mposhtur 9 herë në po aq ndeshje të luajtura në total.
Trepça arriti në finale të Superkupës pasi e mposhti Borën në çerekfinale dhe Golden Eagle Yllin në gjysmëfinale, ndërsa Prishtina ishte më e mirë se Vëllaznimi dhe Peja.
