Presidentja e Kosovës, Vjosa Osmani ka kujtuar 23-vjetorin e sulmeve tragjike të 11 shtatorit të vitit 2001 në Amerikë.
Osmani ka thënë se kjo ditë ndryshoi përgjithmonë rrjedhjen e historisë e cila la gjurmë të pashlyeshme në zemrat e familjeve të viktimave.
“Tmerri dhe humbja e pakuptimtë e afër 3000 jetëve na kujtojnë brishtësinë e paqes dhe dhimbjen e thellë, të cilën e ka shkaktuar ky akt terrorist. Imazhet, pikëllimi dhe ankthi mbeten të gdhendura në kujtesën tonë kolektive”, ka thënë presidentja.
Derisa, ajo ka thënë se në këtë ditë gjen forcën në unitet, duke qëndruar përkrah popullit amerikan.
“Në këtë ditë ne gjejmë forcën në unitet, duke qëndruar përkrah popullit amerikan, si gjithmonë, në mbrojtje të paqes, drejtësisë dhe një të ardhmeje më të mirë!”, shkroi presidentja./teve1.info/