Të hënën në Reporting House u bë bashkëbisedim me Alan Chin, fotoreporterin e gazetës ‘’The New York Times’’, i cili kishte shkrepur fotografinë e njohur në funeralin e Ali Paçarizit, luftëtarit të UÇK-së në shtatorin e vitit 1998.
Përqafimin e fundit po ia jep të birit.
E mbi trupin e tij, vajin nuk e ndal.
Është kjo fotografi e bërë në shtatorin e vitit 1998, gjatë funeralit të Ali Paqarizit, luftëtarit të UÇK-së.
E autori i kësaj fotografie, Alan Chin, mbi dy dekada pas përfundimit të luftës erdhi në Kosovë.
Para të pranishmëve, fotoreporteri i ‘’The New York Times’’ kujton se si kuptoi se po ndodhte diçka në Kosovë atë kohë.
“Pastaj Kosova, 1997. Pra, kjo është protesta e fundit…Ne e dinim se diçka po ndodhte në Kosovë, dhe në fakt para kësaj, një natë më parë apo para kësaj ka ndodhur një protestë e heshtur natën në rrugën kryesore pikërisht këtu…dhe menduam, në rregull, le të shkojmë të shohim se çfarë po ndodh. Pra, ne në fakt dhe përsëri vetëm për t’ju thënë se sa naivë ishim, zbritëm me makinë nga Beogradi,… Kur gjërat u bënë më të mëdha, atëherë erdhën të gjitha mediat e mëdha dhe erdhën gjithnjë e më shumë zyrtarë… dhe pastaj sigurisht, ne e dimë se çfarë ndodhi, policia serbe filloi t’i rrahë të gjithë pa asnjë paralajmërim, mendoj se kam harruar sa njerëz janë rrahur, por ishte shumë, dhe ishte shumë keq”, thotë fotoreporteri Alan Chin.
Ai më tutje rrëfeu për xhirimet e kryera gjatë luftës.
“Mbaj mend që arrita në Kosovë me 60 ose 80 filma në çantë, dhe, e dini, dhe çdo udhëtim zgjaste ndoshta disa javë ose një muaj, dhe shumë herë më mbaronin filmat dhe për fat kishte dyqane të mrekullueshme fotografie këtu ku ne ishim në gjendje të blinim më shumë filma”, tregon ai.
Ndërsa për vendin pas luftës, Chin thotë se ka ndryshuar shumë.
“Ky është ndoshta një nga vendet ku kam qenë që ka ndryshuar më shumë. Unë mendoj se mund të them se, disa vende të tjera, ju e dini se Sarajeva sigurisht që ka ndryshuar, por jo si Prishtina dhe Kosova”, theksoi ai.
Alan Chin ka realizuar dhjetëra fotografi nga lufta, duke dëshmuar kështu mbi krimet e serbëve në Kosovë.
