Misioni i Shteteve të Bashkuara të Amerikës në Kosovë në OSBE, është shprehur i shqetësuar me veprimet e pakoordinuara dhe provokuese të ndërmarra nga Qeveria e Kosovës.
Në reagim thuhet se, këto veprime kanë pasur efekt negativ ndaj pjesëtarëve të komunitetit etnik serb dhe pakicave tjera në Kosovë, si dhe kanë vënë në rrezik jo vetëm qytetarët por edhe ushtarët e KFOR-it.
“Ne kemi shprehur shqetësimin tonë lidhur me veprimet e pakoordinuara dhe provokuese të ndërmarra nga Qeveria e Kosovës, të cilat kanë pasur efekt të drejtpërdrejtë dhe negativ ndaj pjesëtarëve të komunitetit etnik serb dhe komuniteteve tjera pakicë në Kosovë. Ata i vënë qytetarët kosovarë dhe ushtarët e KFOR të udhëhequr nga NATO në rrezik më të madh dhe minojnë reputacionin e Kosovës si një partner i besueshëm ndërkombëtar”, theksohet në reagim.
Misioni i SHBA-së në OSBE, u ka bërë thirrje udhëheqësve të Kosovës, që të promovojnë një shoqëri e cila respekton të drejtat e të gjithë atyre që jetojnë në Kosovë.
“Ne vlerësojmë punën e atyre, përfshirë Misionin në terren të OSBE-së në Kosovë, Misionin e Bashkimit Evropian për Sundimin e Ligjit në Kosovë dhe Forcën e Kosovës, të cilët parandalojnë dhunën dhe bëjnë thirrje për përmbajtje të vazhdueshme nga të gjithë të përfshirët dhe të prekurit.Ne vazhdojmë ta mbështesim Kosovën si një demokraci sovrane, multietnike dhe u bëjmë thirrje udhëheqësve të saj që të promovojnë një shoqëri që respekton të drejtat gjithëpërfshirëse për të gjithë ata që jetojnë në Kosovë”, thuhet në reagim.
Më tej, thuhet se ‘çështjet kanë të bëjnë me strukturat e mbështetura nga Serbia në Kosovë duhet të trajtohen përmes Dialogut të lehtësuar nga BE-ja, siç është rënë dakord nga të dyja palët’.
Sipas misionit, dialogu është e vetmja mënyrë që Kosova të sigurojë marrëdhënie të mira me fqinjët dhe të përparojë në rrugën evropiane.
“Çështjet që kanë të bëjnë me strukturat e mbështetura nga Serbia në Kosovë duhet të trajtohen përmes Dialogut të lehtësuar nga BE-ja, siç është rënë dakord nga të dyja palët. Ne e shohim të ardhmen e Kosovës në Evropë dhe të integruar plotësisht në institucionet evropiane dhe euroatlantike. Dialogu i normalizimit i lehtësuar nga BE-ja ndërmjet Kosovës dhe Serbisë është mënyra për të siguruar që Kosova të ketë marrëdhënie më të mira me fqinjët e saj dhe të përparojë në rrugën e saj evropiane. Ne përsërisim thirrjen tonë për Kosovën dhe Serbinë që të ecin përpara me urgjencë në zbatimin e marrëveshjes që arritën në mars 2023. Përfundimisht, Shtetet e Bashkuara besojnë se normalizimi duhet të çojë në njohje reciproke ndërmjet Kosovës dhe Serbisë.Shtetet e Bashkuara do të mbeten të angazhuara në mënyrë aktive, në koordinim me partnerët tanë të BE-së, në mbështetje të një marrëdhënieje të parashikueshme dhe paqësore ndërmjet Kosovës dhe Serbisë, në bazë të marrëveshjeve dhe detyrimeve të tyre të Dialogut”, përfundon reagimi./teve1.info/
