Ministrja e Jashtme e Finlandës, Elina Valtonen, po qëndron në Kosovë. Ajo u takua me kryediplomaten kosovare, Donika Gërvalla. Nga aty u theksua mbështetja e shtetit finlandez për shtetin e Kosovës, në proceset integruese, por edhe në dialogun Kosovë – Serbi.
Posa ateroi në Prishtinë, ministrja e jashtme finlandeze, Elina Valtonen, u prit nga kryediplomatja kosovare, Donika Gërvalla.
Më pas ato zhvilluan një takim në Ministrinë e Punëve të Jashtme.
Gërvalla tregoi për temat që u diskutuan.
“Pjesë e rëndësishme e diskutimeve tona sot, u përqendrua në sfidat aktuale të sigurisë në Evropë. Agresioni rus ndaj Ukrainës dhe sjellja hegjemoniste dhe agresive ndaj fqinjëve dhe aleatëve të Rusisë në Evropë, paraqesin një kërcënim të madh dhe serioz për paqen dhe stabilitetin evropian. Ne në Kosovë, e kuptojmë më mirë se kushdo tjetër ndoshta rëndësinë e mbrojtjes së vlerave demokratike dhe të drejtës për vetëvendosje“, tha Gërvalla.
Sipas Gërvallës, në takim me homolgen e saj finlandeze u fol edhe për situatën në veri të vendit.
“Kemi diskutuar edhe për sigurinë në veri të vendit, e në veçanti për situatën e urës kryesore në Mitrovicë. Kjo urë, e cila ka simbolizuar ndarje dhe përçarje për shumë vite, duhet të hapet. Vetëm kështu ajo shndërrohet në një simbol të pajtimit dhe bashkimit”, tha ajo.
Ministrja e jashtme e Finlandës, Valtonen, theksoi mbështetjen që shteti i saj ofron për Kosovën.
“Finlanda ka qenë dhe mbetet një mik i fuqishëm i Kosovës, dhe kjo u thekua në takimin e sotëm. Si mbështetje e fuqishme për Kosovën kemi qenë qysh nga koha kur ajo e ka fituar pavarësinë e saj, dhe vazhdojmë ta mbështesim në rrugëtimin për anëtarësim në BE dhe në NATO“, ta Valtonen.
Madje, sipas saj, Finlanda është e gatshme të ndihmojë edhe në dialogun mes Kosovës dhe Serbisë.
“Kemi biseduar për dialogun mes Prishtinës dhe Beogradit. Finlanda është e gatshme që të bëjë çka është e mundur për të përkrahur këtë proces. Finlanda është mëse e gatshme që të punojë intensivisht për të shtuar raportet tona tregtare dhe për t’i forcuar ata sektorë premtues mes vendeve tona, sikurse janë digjitalizimi, energjia e pastër dhe bio-ekonomia”, tha ajo.
Përpos Gërvallës, Valtonen u prit në takim edhe nga kryeministri, Albin Kurti.