Prokuroria Themelore në Prishtinë ka deklaruar se incidenti i mbrëmshëm me armë zjarri në mes pesë personave në rrugën “Gazmend Zajmi” në Prishtinë ka ndodhur për shkak të një mosmarrëveshje të mëhershme mes dy grupeve.
Si pasojë e kësaj përleshjeje mes dy grupeve të armatosura ka mbetur i vdekur një person në vendin e ngjarjes, ndërsa pesë të dyshuar të tjerë kanë marrë lëndime trupore dhe janë dërguar në QKUK.
“Kryeprokurori i Prokurorisë Themelore në Prishtinë Zejnullah Gashi, së bashku me Prokurorin kujdestar kanë dal në vendin e ngjarjes dhe së bashku me hetuesit policor kanë konstatuar se në këtë rast kemi të bëjmë me një përleshje në mes dy grupeve të armatosura si pasojë e mosmarrëveshjeve të mëhershme, ku si pasojë e kësaj një person ka mbetur i vdekur në vendin e ngjarjes, ndërsa pesë të dyshuar tjerë kanë marrë lëndime trupore dhe janë dërguar Klinikën Emergjente në QKUK, për të marrë trajtimin e duhur mjekësor dhe për momentin janë jashtë rrezikut për jetë”, thuhet në komunikatën e Prokurorisë.
Tutje, sipas komunikatës thuhet se janë duke u zhvilluar veprime hetimore në identifikimin e personave të tjerë të përfshirë në këtë rast, të cilët dyshohen se janë persona endë të pa indetifikuar.
“Rasti penal është filluar në drejtim të veprës penale “Vrasja e Rendë” në bashkëkryerje, si dhe veprën penale “Mbajtja në pronësi, kontroll ose posedim të paautorizuar të armëve” ku në këtë rast me vendim të prokurorit janë ndaluar pesë (5) persona, si dhe janë duke u zhvilluar veprime hetimore në identifikimin e personave të tjerë të përfshirë në këtë rast pasi që dyshohet se në këtë rast janë të përfshirë edhe persona të tjerë ende të pa identifikuar”, thuhet ndër të tjera./teve1.info/