Kanë filluar punimet përsëri në urën e Badocit në rrugën Prishtinë – Gjilan, edhe pse kjo urë sipas kontratës, do duhej të ishte përfunduar para dy muajsh. Derisa banorët treguan për televizionin vështirësitë që po hasin në rrugën dytësore.
Por kjo rrugë është kthyer në një sfidë për qytetarët që nga muaji prill i vitit 2023, kur kishte nisur prishja e urës për ta ndërtuar një të re.
Bëhet fjalë për urën e Badocit në rrugën Prishtinë – Gjilan.
Kjo urë ishte mbyllur për shkak të rrezikshmërisë së lartë dhe kësisoj Ministria e Infrastrukturës hapi një rrugë të re me gjatësi prej 2 kilometra.
Por ky devijim i rrugës po shkakton shpeshherë kolonë dhe nervozizëm te shoferët që udhëtojnë çdo ditë.
“Mjaft është vështirë kjo pjesë disa kthesa, mjaft e vështirë”, “Mjaft herë ka fillu një kohë të gjatë por nuk po kryhet”, ka thënë qytetari, Faik Nobërdaliu.
“Këtu i kanë fajet krejt Qeveria, që dy vite e diçka është kështu krejt katastrofë e zotit, këtë kanë mundur me kry brenda dy tre muajve”, ka thënë qytetari, Xhelajdin Salihu.
Ndërtimi i kësaj ure ishte paraparë të përfundonte për 4 muaj, por punimet ende nuk kanë përfunduar.
E vlera e saj është paraparë të jetë 468 mijë euro.
Tëvë 1 ka dërguar pyetje në Ministrinë e Infrastrukturës, mirëpo deri në publikimin e kësaj kronike nuk kanë kthyer përgjigje.
