Kryeministri i Kosovës, Albin Kurti, e ka takuar sot ambasadoren e re të Holandës në Kosovë, Karin Boven.
Zyra e Kryeministrit, ka bërë të ditur se në takim Kurti e ka uruar për detyrën ambasadoren e re, teksa e ka falënderuar për mbështetjen dhe kontributin e Holandës ndaj Kosovës për anëtarësim në Këshillin e Evropës, shkruan teve1.info
“Në këtë takim të parë mes tyre, Kryeministri e uroi për detyrën e re, teksa e falënderoi për mbështetjen e vazhdueshme dhe kontributin e Holandës ndaj Kosovës në çlirim e zhvillim dhe për mbështetjen në anëtarësimin në Këshillin e Evropës. Ai shtoi se Kosova synon të bëhet anëtare edhe e BE-së dhe NATO-s duke iu bashkangjitur Holandës dhe shumë shteteve të tjera aleate e partnere”, – thuhet në njoftim.
“Së bashku, kryeministri dhe ambasadorja theksuan marrëdhëniet e mira bilaterale mes Kosovës dhe Holandës dhe angazhimin për thellimin e forcimin e mëtejmë të tyre. Kryeministri Kurti e njohu ambasadoren me progresin socio-ekonomik e demokratik të vendit, i cili është dëshmuar në tri vitet e fundit dhe nga indikatorët, matjet e rankimet pozitive ndërkombëtare”, – thuhet më tej.
