Presidentja e Kosovës, Vjosa Osmani, ka thënë se Kosova është e gatshme të anëtarësohet në NATO dhe t’i kontribuojë unitetit transatlantik në mbrojtje të vlerave të përbashkëta të paqes, demokracisë e lirisë.
Ajo këto komente i ka bërë gjatë një takimi që ka zhvilluar me Ndihmës Sekretarin e Përgjithshëm të NATO-s për Çështje të Jashtme dhe Siguri, ambasadorin Boris Ruge.
“Presidentja Osmani ka përsëritur mirënjohjen e Kosovës për kontributin e vazhdueshëm të NATO-s në Kosovë, ndërsa ka ritheksuar përkushtimin e Kosovës për anëtarësim në NATO. Presidentja Osmani ka potencuar se Kosova është e gatshme që t’i kontribuojë unitetit transatlantik në mbrojtje të vlerave të përbashkëta të paqes, demokracisë e lirisë”, thuhet në komunikatën e Presidencës.
Në këtë takim është diskutuar edhe për hapjen e urës së Ibrit, ku Osmani siç thuhet në komunikatë ka thënë se hapja e saj është akt i normalizimi dhe integrimit të gjithë qytetarëve, duke shprehur rëndësinë e koordinimit
“Presidentja Osmani ka cekur rëndësinë e konsultimit dhe koordinimit në mes të institucioneve tona dhe partnerëve tanë të sigurisë, veçanërisht me NATO-n, në mënyrë që të ndërtohet plani i përbashkët i zbatimit për hapjen e urës”, thuhet në komunikatë.
Tutje, Presidentja Osmani e uroi z. Ruge për samitin e suksesshëm të NATO-s në Ëashington D.C., ku Republika e Kosovës u përfshi për herë të parë në një sërë aktivitetesh në kuadër të samitit, me ftesë të Presidentit Biden dhe Sekretarit Blinken, e ku u riafirmua uniteti transatlantik dhe mbështetja e përbashkët për Ukrainën./teve1.info/
