Në ditën ndërkombëtare të fotografisë, kryeministri i Kosovës, Albin Kurti ka shpërndarë disa nga momentet e bukura që kanë kapur me aparatet e tyre fotografët kosovarë.
Ai ka bërë thirrje që vlerësohet puna dhe përpjekjet e tyre që të zënë çastet më të rëndësishme.
Kurti ka thënë se fotografët pasqyrojnë edhe sjelljet jo të mira të shoqërisë sonë, që kanë të bëjnë me shkatërrimit e mjedisit, e kjo sipas tij bëhet për ndërgjegjësim që të ruhet mjedisi ku jetojmë.
“Fotografët vazhdojnë të mbesin ata që prezantojnë para botës imazhet e njerëzve zemërgjerë e bujarë, mikpritjen dhe punën, vlerat dhe trashëgiminë tonë kulturore si dhe bukuritë e pafundme të natyrës magjepsëse të vendit tonë, përfshirë këtu dokumentimin e kafshëve të egra të cilat janë pasuri e paçmueshme. Por, përveç këtyre ata sjellin imazhe ku pasqyrohen edhe sjelljet dhe vetitë jo të mira të shoqërisë sonë e sidomos ato që shkaktojnë dëm mjedisor. Imazhe këto që kanë synim të na ndërgjegjësojnë e të na bëjnë të kuptojmë rëndësinë e mbrojtjes së natyrës dhe pasurive tona”, ka shkruar Kurti.
