Presidentja e Kosovës, Vjosa Osmani sot ka vizituar komunën e Vitisë, ku është pritur nga kryetari i kësaj komune Sokol Haliti.
Sipas njoftimit të komunës, në këtë takim kryetari e ka njoftuar Osmanin për zhvillimet aktuale në këtë komunë, projektet që janë duke u realizuar si dhe me sfidat dhe të arriturat e gjithëmbarshme.
“Komuna e Vitisë, njihet me një numër të madh të qytetarëve të saj në mërgatë e cila është tejet e organizuar dhe kontribuuese e shumë zhvillimeve në komunën tonë, sikur edhe mbështetëse e shumë projekteve. Vitia është e njohur edhe me pozitën e saj me një kualitet të lartë të tokës bujqësore dhe prodhimtarëve të saj”, tha Haliti.
Duke folur për gjendjen aktuale, ai e ka njoftuar presidenten se është ndër komunat që në saje të raporteve të fundit ka ulje drastike të dukurive devijonte gjë që e bënë si komunë shembull në luftimin e këtyre dukurive duke e shndërruar në një komunë të qetë dhe pa eksese.
Derisa, Osmani e ka falënderuar Halitin për ftesën që t`a vizitoj Vitinë dhe shprehu kënaqësinë për të arriturat në komunën e Vitisë.
“Patëm një takim me kryetarin ku u njoftova nga kryetari Haliti për gjitha zhvillimet dhe është shumë inkurajuese që të shohim se si Vitia është njëra prej komunave me shembullin më të mirë se si luftohen dukuritë devijonte, si luftohen dukuritë kriminale, shembull ku në krahasim me vitin e kaluar ka një rënie për 100% të këtyre dukurive, për shkak të ndërmarrjes së masave, dukuri këto që po e njollosin shoqërinë tonë. Po ashtu Vitia është shndërruar në shembull për bashkëpunimin me faktorin ndërkombëtar sa i përket nivelit komunal. Pra është një komunë me mbi 30 memorandume bashkëpunimi me organizata të ndryshme nga USAID-i amerikan deri të Bashkimi Evropian, duke arrit me realizua projekte të ndryshme në interes të qytetarëve”, tha Osmani.
Ndryshe, në fund të takimit, kryetari e ka nderuar presidenten me një dekoratë, ndërkohë që më pas së bashku kanë vizituar edhe obeliskun para objektit të Komunës së Vitisë të ish sekretares amerikane Medeline Olbriht dhe shtatoren e Nënës Terezë, për të vazhduar më pas në Letnicë në manifestimin për nder të Ditës së Zojës së Madhe./teve1.info/
