Federata e Hendbollit të Kosovës ka njoftuar se tashmë është zyrtare që Genc Bujupi dhe Getoar Bujupi, dy gjyqtarët e Federatës së Hendbollit të Kosovës, do t’i drejtojnë ndeshjet evropiane të klubeve dhe ekipeve kombëtare.
“Çifti i gjyqtarëve Bujupi tashmë edhe zyrtarisht kanë bexhin e EHF-së dhe vetëm pritet fillimi i edicionit të ri garues në Evropë për delegimet e para. EHF-ja të premten njoftoi zyrtarisht se 13 çifte gjyqtarësh morën bexhin e “EHF Referee”. Kurset e fundit janë mbajtur në Prishtinë dhe në Drammen të Norvegjisë.
Federata ka njoftuar se Genc e Getoar Bujupi kanë qenë në programin e EHF-së, Young Referee Programme, ndërsa në hendbollin kosovar ka shumë vjet që janë prej gjyqtarëve kryesorë.
Ata kanë drejtuar me shumë sukses ndeshje të shumta në Evropianin U20 për hendbollistë që u mbajt muajin e kaluar në Prishtinë.
Është ky një tjetër sukses i Federatës së Hendbollit të Kosovës që sërish i ka katër çifte gjyqtarësh me thirrje të EHF-së.