Prokuroria e Speciale e Kosovës ka bërë të ditur se në bashkëpunim me Policinë e Kosovës dhe Prokuroria Themelore në Shkup dhe Policia e Maqedonisë së Veriut, kanë arrestuar një shtetas maqedonas nën dyshimin për falsifikim të parave.
Tëvë 1 gjatë ditës kishte raportuar për këtë aksion.
Sipas komunikatës së përbashkët të dy prokurorive thuhet se ekipi i përbashkët hetimor i krijuar pas gjatë viteve 2023-2024 kanë ndërmarrë disa veprime për parandalimin e futjes së parave të falsifikuara, përkatësisht të parave në valutën Euro, pasi që ishin hasur disa raste të vënies në qarkullim të parave të falsifikuara, të cilat kishin çrregulluar tregun e parave si dhe kishin dëmtuar interesin publik.
“Me datë 4 Gusht 2024 në Kosovë është arrestuar një shtetas i Maqedonisë së Veriut i dyshuar për prodhimin dhe shpërndarjen e parave të falsifikuara me prerje metalike prej 2 (dy) Euro, ndërsa në Maqedoninë e Veriut janë kryer kontrolle në tri lokacione. Gjatë kontrollit u sekuestruan makineri për prodhimin e parave të falsifikuara me prerje metalike 2 (dy) Euro, shabllone parash dhe materiale të tjera për prodhimin e monedhave të falsifikuara, duke përfshirë të gjithë lëndën e parë të prodhimit të tyre”, thuhet në komunikatë.
Me aktvendim të prokurorit të rastit nga Prokuroria Speciale e Republikës së Kosovës, shtetasi maqedonas është ndaluar përkohësisht për 48 orë dhe ndaj tij në afat ligjor do të parashtrohet kërkesë në gjykatë për caktimin e masës për sigurimin e prezencës së tij në procedurë.
Ky operacion sipas komunikatës është mbështetur nga Europol dhe Eurojust/WB Crim Just Project.
