Tri klube nga tri vende të ndryshme kanë shprehur interesim për mbrojtësin e Kombëtares së Shqipërisë, Arlind Ajeti.
Bëhet e ditur se Cluji ka marrë ofertë për Ajetin, kartoni i të cilit vlerësohet 1 milionë euro pasi 30-vjeçari ka kontratë me ekipin rumun deri në vitin 2025.
Emrat e klubeve nuk janë bërë të ditura, por mësohet se një klub nga Turqia, një nga Arabia Saudite dhe një tjetër nga Emiratet e Bashkuara Arabe po kërkojnë shërbimet e Ajetit.
Te Cluji janë të gatshëm ta shesin Ajetin, i cili tregoi paraqitje të mira në “Euro 2024” me fanellën e Kombëtares së Shqipërisë.
Ajeti ishte i pazëvendësueshëm te Shqipëria në të trija ndeshjet e Grupit B, me Italinë, Kroacinë dhe Spanjën.
Ai ka 28 paraqitje dhe një gol të shënuar për kombëtaren shqiptare kurse është pjesë e skuadrës së Clujit prej verës së vitit të shkuar.
Me fanellën e Clujit, Ajeti ka regjistruar 25 ndeshje dhe ka shënuar 3 gola në të gjitha garat.
