Ndihmësekretarja amerikane për Byronë e Çështjeve Evropiane dhe Euroaziatike, Karin Donfried në një konferencë për media pas takimit me presidenten e Kosovës, Vjosa Osmanin, tha se marrëveshja për normalizim të marrëdhënieve mes Kosovës e Serbisë duhet të jetë i përqendruar në njohjen e ndërsjellë.
“Lufta në Ukrainë ka treguar se sa urgjente është të punojmë për t’u siguruar që Kosova dhe fqinjët e saj të vazhdojnë me reformat e domosdoshme për konsolidimin demokratik e integrimin e tyre në institucionet evropiane dhe euroatlantike… Kjo nëpërmjet avancimit të përpjekjeve që të sigurohemi që Kosova do të marrë vendin e duhur në institucionet evropiane dhe euroatlantike, përfshirë përmes marrëveshjes së normalizimit të marrëdhënieve me Serbinë, që përqendrohen në njohje të ndërsjellë”, tha Donfried.
Ajo më tej duke folur për sigurinë në Kosovë, tha se përkushtimi i SHBA-së për Kosovën mbetet i fuqishëm.
“Shumë kosovarë janë të shqetësuar për sigurinë e Kosovës. Dua t’ju sigurojë se përkushtimi i SHBA-së dhe aleatëve mbetet i fuqishëm. KFOR-i, që është zbarkimi më i madh i NATO-s, është një manifestim i madh dhe i dukshëm i përkushtimit tonë të vazhdueshëm për sigurinë dhe stabilitetin e Kosovës. SHBA-ja është krenare që Kosova mund ta quajë partnere të saj”, u shpreh Donfried.