Kryetari i Partisë Demokratike të Kosovës, Memli Krasniqi pas tërheqjes nga gara të presidentit, Joe Biden ka thënë se ai ka qenë një shtyllë e fort mbështetëse për Kosovën.
Përmes një postimi në Facebook, Krasniqi ka thënë se angazhimi i Joe Biden për shtetin e Kosovës ka qenë i pandërprerë, shkruan teve1.info
“Në rrugëtimin e Kosovës për liri, pavarësi e zhvillim, Presidenti Biden ka qenë gjithmonë një shtyllë e fortë mbështetëse. Si senator, si zëvendëspresident dhe si president i SHBA-së, angazhimi i Joe Biden për shtetin tonë ka qenë i pandërprerë”, ka shkruar Krasniqi.
Tutje i pari i PDK-së, deklaroi se lidhja e Presidentit Biden me Kosovën tejkaon pozicionet që ka bartuar ai dhe shtrihet edhe në rrafshin familjar.
“Lidhja e Presidentit Biden me Kosovën tejkalon pozicionet që ka bartur ai dhe shtrihet edhe në rrafshin familjar. Beau Biden, djali i tij i ndjerë, pas çlirimit të Kosovës, kishte kontribuar në ndërtimin e institucioneve tona. Sot, me krenari, një rrugë e vendit tonë mban emrin e tij. Dje, kur Presidenti Biden publikoi vendimin për tërheqje nga gara presidenciale, për rastësi, ishte edhe 14 vjetori i vizitës së delegacionit tonë në Shtëpinë e Bardhë, të cilit i printe ish-Kryeministri Thaçi. Atë ditë, ish-zëvendëspresidenti Biden, duke mos e fshehur mbështetjen dhe admirimin e tij për asnjë moment, e kishte quajtur ish-Kryeministrin Thaçi si “George Washingtoni i Kosovës”, ka shkruar Krasniqi në Facebook.
Ndryshe, për tërheqjen nga gara presidenciale të Joe Biden ka reaguar edhe kryeminsitri i Kosovës, Albin Kurti dhe liderë të tjerë botërorë.
Presidenti amerikan, Joe Biden, ka bërë të ditur se do të tërhiqet nga gara për zgjedhjet presidenciale të nëntorit dhe i ka ofruar mbështetje nënpresidentes, Kamala Harris për t’i hyrë garës.
Përmes një deklarate të lëshuar në rrjetet sociale, Biden ka thënë se beson që tërheqja nga gara është në interesin më të mirë të Partisë Demokratike dhe Shteteve të Bashkuara, në mënyrë që të fokusohet tërësisht në kryerjen e mandatit që ka aktualisht.
