Në mungesë të kushteve e diskriminim nga federata, notarja Hana Beiqi flet për synimet e saj në Lojërat Olimpike
Me ftesë të universalitetit nga Komiteti Olimpik Ndërkombëtar, notarja Hana Beiqi ka fituar të drejtën që ta përfaqësojë Kosovën në Lojërat Olimpike në Paris.
Ajo thotë se ky është një rast i mirë për të dëshmuar aftësitë e saj në një garë kaq të rëndësishme, pasi që ka mungesë të kushteve elementarë që kualifikimi të arrihej përmes normës olimpike.
“Siç po e shohim ne nuk jemi as afër normës olimpike për shkak mund të themi edhe kushteve që nuk i kemi, pra as pishinë olimpike nuk kemi, ne ushtrojmë këtu në pishinë gjysmë olimpike, do të thotë pa i plotësuar të gjithë kushtet. Por, me rëndësi kemi arritur rezultatet unë dhe Adelli ta përfaqësojmë Kosovën, shpresojmë që ta çojmë në nivelin sa më të lartë, ta japin maksimumin tonë, shpresojmë që pas katër viteve në Amerikë të kemi një normë dhe të jemi afër medaljeve”, tha Beiqi.
Beiqi bën të ditur se është diskriminuar jashtëzakonisht shumë nga Federata e Notit të Kosovës, e cila nuk e lejoi të merrte pjesë në dy kampionate botërore dhe kjo e bëri që ta mendonte largimin nga sporti i notit.
Ajo nuk e fsheh aspak ndjenjën e krenarisë që në Paris, do të jetë në mesin e vajzave që kanë fituar medalje olimpike.
Përveç Hana Beiqit, në sportin e notit në Paris, Kosova do të përfaqësohet edhe nga notari, Adell Saboviq.
