Një polic serb është vrarë dhe një tjetër është plagosur në Loznicë të Serbisë. Autoritetet atje kanë thënë se në vendin e ngjarjes është gjetur një pasaportë e Artan Hajrizit, vëllait të Faton Hajrizit që u arratis nga burgu më 6 korrik.
E njohësi i çështjeve të sigurisë, Nuredin Ibishi po vlerëson se institucionet e Kosovës kanë bërë pak në drejtim të kapjes së të arratisurve nga burgu, konkretisht të Faton Hajrizit.
Ngjarjen e ndodhur në Serbi, Ibishi po e sheh me pasoja të rënda, duke qenë se sipas tij zbardhja e rastit nuk është e lehtë me shtetin serb që Kosova nuk ka një bashkëpunim të mirëfilltë policor e juridik.
“Ngjarje mjaftë e rëndë, akt kriminal…Dyshimet janë që është Faton Hajrizi, çështjet tjera që ndërlidhen me arratisjen e tij, po edhe shumë të tjerëve më herët tregon për një situatë të brishtë në këto institucione dhe mundësia që ata të kapen me kohë dhe të kthehen në vuajtjen e burgut, mendoj që në këtë drejtim pak është bërë në Kosovë dhe kjo po sjell pasojë në vend. Marrë parasysh çfarë është situata mes Kosovës dhe Serbisë, pra nuk ka një bashkëpunim të mirëfilltë policor e as juridik në kuptim të këmbimit të informacioneve, ku pasojat do të jenë edhe më të rënda”, është shprehur ai në emisionin “Info Nata” në Tëvë 1.
Ndërsa, njohësi i sigurisë ka bërë thirrje që institucionet e Kosovës të jenë vigjilente, pasi ai thotë se në Serbi janë kujdestar për të inskenuar ngjarje.
“Ata janë kujdestar për të inskenuar. Por gjithsesi institucionet tona duhet të jenë më vigjilente dhe proaktive për të treguar se kanë bërë gjithçka që është e mundur që ky person dhe të tjerë që janë në arrati të kapen dhe të arrestohen”, ka shtuar Ibishi. /tëvë1.info
