Basketbollisti Edon Maxhuni ka ndërruar ekip, por jo edhe kampionat.
Maxhuni të enjten është zyrtarizuar te skuadra nga Franca, SIG Strasbourg dhe me këtë ekip ka firmosur kontratë dyvjeçare.
SIG Strasbourg është skuadër që për sezonin e ri ka buxhet prej 7 milionë eurosh dhe synimet i ka të mëdha, ndërsa Maxhunin po e vlerëson si përforcim të rëndësishëm.
“Në kërkim të një lideri të ri në rritje, por tashmë edhe me përvojë, Strasbourg firmosi me lojtarin finlandez Edon Maxhuni për dy sezonet e ardhshme”, shkruan në faqen zyrtare të ekipit francez.
26-vjeçari sezonin e shkuar luajti në Francë, ku ishte pjesë e ekipit Le Portel dhe kishte një mesatare prej 11 pikëve e 4 asistimeve për ndeshje.
Ai gjithashtu, karrierë ka bërë edhe në Gjermani, Finlandë e Spanjë.
Fundori i gjatë 188 centimetra është me prejardhje nga Kosova por i lindur dhe rritur në Finlandë, shtet të cilin e përfaqëson ndërkombëtarisht.
Së fundmi, Maxhuni ishte i lidhur me një kalim te kampionia e Kosovës, Trepça kurse në të shkuarën interesim për shërbimet e tij kishin shprehur edhe Sigal Prishtina e Golden Eagle Ylli.
