Skuadra e Baselit po synon rikthimin e Xherdan Shaqirit në ekip gjatë kësaj vere dhe një lëvizje e tillë po shihet më se e mundur, ka shkruar e përditshmja zvicerane “Blick” të enjten.
Bëhet e ditur se Shaqiri nuk e ka ndërmend të kthehet te Chicago Fire dhe tashmë ka njoftuar ekipin amerikan për vendimin e tij, i cili është që karrierën ta vazhdoj në Evropë.
Duke pasur parasysh këtë situatë, Baseli po insiston në transferimin e Shaqirit por nuk do ta ketë lehtë për ti siguruar shërbimet e tij.
Në garë për mesfushorin shqiptar është edhe Panathinaikosi i Greqisë që i ka ofruar pagë vjetore prej tre milionë frangash zvicerane.
Afati kalimtar në MLS, ligën amerikane mbyllet pas një muaji dhe transferimi i Shaqirit në Evropë duhet të kryhet së shpejti, në të kundërtën ai mbetet pjesë e Chicago Fire deri në fund të këtij viti kur edhe i skadon kontrata.
32-vjeçari në fillim të vitit 2022 iu bashkua ekipit amerikan, ndërsa në Evropë ka luajtur tek Lyoni, Liverpooli, Stoke City, Interi, Bayerni e Baseli.
Në fillim të kësaj jave, Shaqiri njoftoi për tërheqjen e tij nga Zvicra, kombëtare për të cilën ka regjistruar 125 paraqitje dhe ka shënuar 32 gola. Ai ishte pjesë e Zvicrës në “Euro 2024”, turne në të cilin shënoi 1 gol.
